Monusco n’Ubuyobozi Bukuru bw’ishami ry’Umuryango w’Abibumbye ryita ku Burenganzira bwa Muntu (OHCHR) baratangaza ko imitwe itatu y’inyeshyamba yongereye ibitero byayo ku basivili muri Ituri, mu burasirazuba bwa Repubulika iharanira Demokarasi ya Congo kuva muri Gicurasi 2020 kugeza mu Ukuboza abaturage basaga 600 bakaba barishwe.
Iyo mitwe nk’uko byatangajwe mu itangazo ryashyizwe ahagaragara kuri uyu wa Gatanu, ni CODECO (Coopérative de Développement Économique du Congo), FPIC (Forces Patriotiques Intégrationnistes du Congo) na FPAC (Front Populaire d’Autodéfense)/Zaire.
Kuva muri Gicurasi kugeza mu Ukuboza 2020, ibitero bitandukanye by’inyeshyamba byahitanye byibuze abaturage 647, barimo abagore 120 n’abana 115 nk’uko imibare ya nyuma ya OHCHR ibigaragaza.
Monusco na OHCHR bivuga ko imitwe ibiri mishya muri iyi, FPIC yegereye abaturage bo mu bwoko bw’Aba-Bira na FPAC/Zaire yegereye Aba-Hema, yongereye ubugizi bwa nabi muri uyu mwaka ushize muri Teritwari za Djugu na Mahagi, kugeza muri Teritwari ya Irumu nk’uko iyi nkuru dukesha 7SUR7.CD ikomeza ivuga.
Aba kandi barasaba ko abakora ibyaha bafatwa bakagezwa imbere y’ubutabera bakabihanirwa, ndetse hakageragezwa umuco wo gukemura amakimbirane mu mahoro no guharanira ubumwe n’ubwiyunge hagati y’amoko.
