Rutahizamu Cristiano Ronaldo wa Juventus yo mu Butaliyani, yaraye abaye umukinnyi wa mbere ku Isi watsinze ibitego byinshi mu mateka y’umupira w’amaguru, anafasha ikipe ye kwegukana Super Coupe y’Ubutaliyani.
Juventus ya Cristiano yari yahuye na Napoli mu mukino wa Super Coupe, iyitwara igikombe iyitsinze ibitego 2-0.
Cristiano Ronaldo ni we wafunguye amazamu ku munota wa 64 w’umukino, mbere y’uko Arvalo Moratta atsinda agashinguracumu mu minota ya nyuma y’umukino.
Igitego Ronaldo yatsinze cyahise cyuzuza ibitego 760 amaze gutsinda muri kariyeri ye, kinamugira uwa mbere watsinze byinshi mu mateka yisi.
Cristiano Ronaldo waherukaga gutambuka kuri Pele watsinze ibitego 757 bimugira uwa gatatu watsinze ibitego byinshi mu mateka, yaciye agahigo kari gafitwe na Josef Bican.
Umunya-BrĂ©sil Romario ni we uza ku mwanya wa kane n’ibitego 743 yatsinze, mu gihe Lionel Messi wa FC Barcelona aza ku mwanya wa gatanu n’ibitego 719.
Cristiano Ronaldo uzuzuza imyaka 36 mu kwezi gutaha, mu bitego 760 amaze gutsinda harimo 450 yatsindiye Real Madrid, 118 yatsindiye Manchester United, 102 yatsindiye ikipe y’Igihugu ya Portugal ndetse n’ibitego 85 yatsindiye Juventus na Sporting Lisbon.
Umwaka wa 2013 yatsinzemo ibitego 69 ni wo wamubereye mwiza kurusha indi, mu gihe muri 2007 yatsinze ibitego 34, mu 2008 atsinda 35, mu 2009 atsinda 30, mu 2010 atsinda 48, 2011 atsinda 60, 2012 atsinda 63, 2014 atsinda 61, mu 2015 atsinda 57, mu mwaka wakurikiyeho atsinda 55, na ho muri 2017 atsinda 53.
Cristiano watwaye ibikombe hafi ya byose bibaho, avuga ko ikimuraje ishinga ari ugutwarana na Portugal Euro ya 2020 yimuriwe muri uyu mwaka, ariko inzozi ze kurusha izindi zikaba ari uguhesha igihugu cye Igikombe cy’Isi.
Ati: “Twatwaye Euro ya 2016 hanyuma ubu turashaka gutwara igikombe cy’Isi. Birashoboka, birashoboka cyane. Buri kintu kirashoboka. Gusa ugomba kuba umunyakuri nanone.”
“Nk’uko nabibabwiye incuro nyinshi cyane, inzozi zanjye ni ugutwarana ibikombe na Portugal kandi natwaye ibikombe bituma numva nishimye. Ntwarana ibikombe na buri kipe nkinira, ariko igikombe cy’Isi ni inzozi, ni zo nzozi.”
