Umuhanuzi Temitope Bolagun Joshua (TB Joshua), yamaze amatsiko abantu benshi bifuzaga kumenya icyo atekereza ku rukingo rw’icyorezo cya Covid-19.
Yabasubije tariki ya 20 Mutarama 2021 nk’uko bigaragara ku rubuga rwa YouTube rwa Emmanuel TV rusanzwe rutambutsa ibiganiro bye.
TB Joshua yagize ati: “Bijyanye n’ibiri ku Isi, nakiriye ibihumbi bya emails zivuga ku rukingo rwa Covid-19. Nta gushidikanya, hari imigambi mibisha myinshi kuri uru rukingo.”
Uyu muhanuzi yavuze ko ibihugu biri gushaka uburyo byakwigobotora iki cyorezo, ariko bamwe ntibumve neza iby’uru rukingo. Ati: “Abenshi binubira izi nkingo ariko ni ibisanzwe. Ndibuka ko nanjye byigeze kumbaho ubwo nanywaga chloroquine. Ntabwo bivuze ko chloroquine ari mbi, ari hari benshi ifasha.”
Chroloquine ni umwe mu miti yageragejwe bwa mbere muri Leta Zunze Ubumwe za Amerika, ubwo harebwaga niba wavura icyorezo cya Covid-19.
TB Joshua yasoje avuga ko muri iki gihe Isi iri mu rujijo, ibihugu bikeneye inkunga no gukorana n’abahanuzi. Ati: “Muri iki gihe, ibihugu byacu bikeneye inkunga n’ubufatanye natwe kubera ko Isi iri mu rujijo.”
