Minisitiri w’Intebe wa Repubulika ya Demukarasi ya Congo, Sylvestre Ilunga Ilunkamba, kuri uyu wa 24 Mutarama 2021 yasanze Joseph Kabila mu mujyi wa Lubumbashi mbere y’uko yegura kuri izi nshingano.
Ni amakuru Ibiro bya Minisitiri w’Intebe wa RDC byemeje yakurikiye itora ry’abagize Inteko Ishinga Amategeko ryabonetsemo ubwiganze bw’amajwi asaba kwegura Ilunga usanzwe ari umuyoboke w’ihuriro mpuzamashyaka rya FCC riyobowe na Kabila.
Minisitiri Ilunga yagize ati: “Ngiye i Lubumbashi guhura na Nyakubahwa Joseph Kabila Kabange, umuyobozi w’icyubahiro wa FCC. Ni we wantanze nk’umukandida ku mwanya wa Minisitiri w’Intebe, bituma Nyakubahwa Perezida wa Repubulika, Umukuru w’Igihugu ampa izi nshingano.”
Abadepite 300 muri 500 bagize Inteko ya RDC yiganjemo abayoboke ba FCC ni bo batoye icyemezo cyo kweguza Minisitiri Ilunga tariki ya 23 Mutarama 2021, ahabwa amasaha 48 yo kuba yeguye.
