Umuyobozi uhagarariye umuryango mpuzamahanga wita ku buzima (OMS) ku mugabane wa Afurika, Dr. Matshisido Moeti yatangaje ko bari gusaba Leta ya Tanzania kwitegura gukingira abaturage icyorezo cya Covid-19.
Dr. Moeti yabitangaje kuri uyu wa 28 Mutarama 2021, mu butumwa yanditse ku rubuga rwa Twitter, atangira ati: “Turi gusaba Tanzania gushyiraho amabwiriza nko kwambara agapfukamunwa mu kwirinda Covid-19.”
Yakomeje agaragaza ko inkingo za Covid-19 zizewe, aboneraho gusaba iyi Leta kwitegura gahunda yo kuzikingira, ati: “Siyansi yerekana ko inkingo zikora, nkaba nshishikariza Leta gutegura uburyo bwo gikingira Covid-19. WHO (OMS) iri hano ngo ifashe Leta n’abaturage ba Tanzania.”
Ijambo rya Dr. Moeti ryashyigikiwe n’Umunyamabanga Mukuru wa OMS, Dr Tedros Adhanom Ghebreyesus wagize ati: “Nifatanyije na Moeti, nsaba ko hashyirwaho ingamba zikomeye z’ubuzima, n’imyiteguro y’urukingo rwa Covid-19. Gutanga amakuru kuri Tanzania nabyo ni ingenzi, mu gihe ubwandu bugaragara mu bagenzi n’abakerarugendo mu mezi menshi.”
Tanzania yaratsembye
Dr. Moeti na Tedros batangaje iby’ubu busabe kuri Tanzania nyuma y’iminsi ibiri Perezida w’iki gihugu, Dr. John Pombe Magufuli yihanangirije Minisitiri w’Ubuzima, Dr. Ummy Mwalimu, amubuza kwihutira kwakira inkingo za Covid-19.
Dr. Magufuli yabitangaje ubwo yari mu gace ka Geita tariki ya 26 Mutarama 2021. Icyo gihe yavuze ko inkingo za Covid-19 “zamamazwa n’amahanga” ari mbi ku buryo zigomba kwitonderwa. Ati: “Inkingo ni mbi cyane. Niba umuzungu yarashoboye gukora inkingo, kugeza ubu yakabaye yarabonye inkingo za SIDA, yakabaye yarabonye inkingo z’igituntu, yakabaye yarabonye inkingo za Malaria, yakabaye yarabonye inkingo za kanseri. […]Tugomba kuba abanyamakenga cyane.”
Uyu Mukuru w’Igihugu usanzwe wemeza ko nta bwandu bwa Covid-19 bukiri muri Tanzania kuva mu ntangirizo za Kamena 2020, yasabye Dr. Mwalimu ko izi nkingo zazakoreshwa ari uko abahanga b’iwabo bamaze kuzisuzuma no kuzemeza.
