Ikigo gikora imiti n’inkingo cya Novavax cyo muri Leta Zunze Ubumwe za Amerika (USA) cyakoze urukingo rwitwa NVX-CoV2373 rwizewe mu gukingira ubwandu bushya bw’icyorezo bw’agakoko ka Coronavirus (B.1.1.7) bwabonetse mu Bwongereza, ku gipimo cya 89.3%.
Nk’uko ubuyobozi bw’iki kigo bubyemeza, uru rukingo rwageragerejwe ku bantu 20,000 biganjemo abari hejuru y’imyaka 65 y’amavuko, barimo abo mu Bwongereza ndetse no muri Afurika y’Epfo; hombi hagaragaye ubwandu bushya bubiri.
Byagaragaye ko uru rukingo rwabasha guhangana n’ubwandu bwa Coronavirus bwabonetse mu Bwongereza ku gipimo cya 89.3%, rugahangana n’ubwabonetse muri Afurika y’Epfo (SARS-CoV-2) ku gipimo cya 50%.
Nk’uko igitangazamakuru The Sun kibivuga, Umuyobozi wa Novavax, Stanley Erck, yijeje ko uru rukingo ruzemezwa mu buryo budakuka niba cyakwifashishwa mu gukingira ubu bwandu bushya mu byumweru bike biri imbere.
Minisitiri w’Intebe w’u Bwongereza, Boris Johnson ubwo yari amaze kumenya iby’uru rukingo, yavuze ko mu gihe byaba byemejwe ko rutangira gukoresha, ku nshuro ya mbere iki gihugu kizasaba doze miliyoni 60 zarwo.
Abashakashatsi bo mu Kigo cya USA gishinzwe kurwanya indwara nyuma y’isuzuma bari bamaze gukora, bamenyesheje inzego z’ubuzima mu Bwongereza ko icyorezo cya B.1.1.7 gifite ubukana burenze ubwa Covid-19, kuko cyo gishobora kuzatwara ubuzima bwa benshi kurusha Covid-19.
