Nyaruguru: Meya yirukanye umwarimu ushinjwa kurarura abakobwa yigisha

Nk’uko ibaruwa yirukana Ndayisenga wigishaga mu Rwunge rw’Amashuri rwa Runyombyi giherereye mu Murenge wa Busanze ibigaragaza, uyu mwarimu yafashwe yasinze ndetse yahaye inzoga aba banyeshuri.

Nyuma yo gufatirwa muri iri kosa nk’uko iyi baruwa ikomeza ibivuga, hateranye inama ebyiri zirimo iyo ku wa 19 Mutarama 2021 y’Akanama gashinzwe gukurikirana amakosa y’abakozi n’indi yo ku wa 29 Mutarama 2021 ya Komite Nyobozi y’Akarere ka Nyaruguru, zemeza iki gihano.

Izi nama zasanze ikosa rya Ndayisenga rikubiyemo atandatu, ari yo: guha inzoga abanyeshuri yigisha kuko bazifatanwe saa yine z’ijoro mu cyumba Ndayisenga araramo, gukura abanyeshuri yigisha ku kigo yigishamo kuri izi saha, akabajyana iwe mu rugo, guhindura abanyeshuri ibirara no kubashora mu ngesho mbi, kwiyandarika no kutiha agaciro mu bo yigisha, kurangwa n’ubusinzi no kwiha ububasha bwo gutwara abanyeshuri b’abakobwa iwe muri aya masaha.

Ku ruhande rwa Ndayisenga, nta kosa na rimwe yemera. Yagize ati: “Ayo makosa yose banshinja, nta na rimwe nemera kubera ko n’abo bana bashatseho amakuru, na bo ntayo bemera. […]”

Uyu mwarimu avuga ko asanzwe aba mu kigo cy’amashuri, kuva aho aba kugera ku cyumba abarimu bakoreramo inama ngo hakaba hari intera ya metero byibuze eshatu.

Yemera ko abanyeshuri 4 barimo umuhungu (Doyen) n’abakobwa batatu ari bo bagiye mu rugo iwe, hari n’abarimu babiri, agasobanura ko uretse ‘umunsi mukuru’ bakoze, nta kindi kidasanzwe cyabaye. Ati: “Bari benshi n’ubwo banditse babiri, bari bansabye umunsi mukuru, baraza nyine ndabagaburira umuceri n’ibintu byo kurya kuko bari bansabye Noheli.”

Yakomeje avuga ko aba banyeshuri banyoye Fanta, we anywa inzoga ya Primus izwi nka Knowless.

Uyu mwarimu agaragaza ko ibyo yakoze nta kosa rikomeye ririmo, ko ahubwo ikibazo kiriho ari icy’abamutabarije, barimo umwe mu bayobozi b’ishuri, wahamagaje umuyobozi w’ishuri, mu gihe yahageraga abanyeshuri babiri b’abakobwa bakajya kwihisha aho arara.

Ngo ibi byose ni byo byatumye ashyirwaho aya makosa amwirukanishije, avuga ko yahimbiwe.