Icyogajuru cy’u Bushinwa ku nshuro ya mbere cyafashe amafoto y’umubumbe wa Mars, mu gihe bukataje mu bushakashatsi mw’isanzure.
Icyogajuru kiswe Tianwen-1, kiri kwerekeza kuri Mars, kuri uyu ewa gatanu ushize nibwo cyohereje ifoto ya mbere y’uyu mubumbe utukura nk’uko byatangajwe n’Ikigo cy’igihugu gishinzwe ubumenyi bw’ikirere (CNSA).
Nk’uko iyi nkuru dukesha L’Express ivuga, iki cyogajuru cyoherejwe mu mpera za Nyakanga giturutse mu Bushinwa, biteganyijwe ko kizagera neza kuri Mars ku itariki 10 Gashyantare.
Ifoto ya mbere yakiriwe ku Isi y’uyu mugabane utukura isa nk’igaragaza ko aha hantu haba hari gaz ndetse hagaragara icyobo gisa nk’icyacukuwe n’ikindi kintu cyahaguye giturutse mu isanzure. Iyo foto y’umweru n’umukara yafatiwe mu birometero nka miliyoni 2,2 uvuye kuri Mars nk’uko iki kigo cy’Abashinwa cyabitangaje.
Iki cyogajuru kirimo abantu babiri ndetse na robot igenzurwa biteganyijwe ko izoherezwa kuri Mars muri Gicurasi. Iyi robot ipima ibiro 200 ifite ‘panneaux solaires’ enye ikaba ifite ubushobozi bwo kumara amezi atatu.
Mu butumwa izahabwa, harimo gusesengura ubutaka bwo kuri Mars, umwuka, gufata amafoto ndetse no gufasha gushushanya ikarita y’uyu mubumbe.
Muri uku kugerageza kwa mbere kw’u Bushinwa gukora ubushakashatsi kuri Mars, burateganya kuzarenza ibyo Leta Zunze Ubumwe zagezeho mu butumwa bwinshi zakoze kuri Mars kuva mu myaka ya za 60.
