Umunyapolitiki utavuga rumwe n’ubutegetsi bwa Repubulika ya Demukarasi ya Congo, Martin Fayulu yatangaje ko abavuga ko Perezida Félix Tshisekedi yatandukanye na Joseph Kabila yasimbuye ku butegetsi, bibeshya.
Yabivugiye mu kiganiro yagiranye n’itangazamakuru, kuri uyu wa 11 Gashyantare 2021, cyabereye mu mujyi wa Kinshasa.
Mu mwaka ushize, Perezida Tshisekedi yafashe icyemezo cyo gusesa guverinoma ye na Kabila, yagiyeho nyuma y’amasezerano bombi basinye muri Werurwe 2019, binyuze mu mahuriro mpuzamashyaka abiri bari bahagarariye, ari yo FCC na CACH.
Nyuma y’iki cyemezo cya Tshisekedi, yashyizeho “Ihuriro Ryera” (Union Sacrée), aha ikaze buri wese wemera gukorana naryo mu kuzuza amasezerano yahaye Abanyekongo ubwo yiyamamarizaga umwanya w’Umukuru w’Igihugu mu 2018, ubu bikaba bigaragara ko riri kugenda ribona abayoboke benshi barimo abahoze ku ruhande rwa Kabila n’abanyapolitiki barwanyaga Kabila.
Fayulu wanze kujya mu Ihuriro Ryera, muri iki kiganiro yasobanuye ko n’ubwo Perezida Tshisekedi agaragaza ko yatandukanye na Kabila, atari ko bimeze, ko ahubwo iri huriro rishya yatangije risa n’irya FCC-CACH rigiye kongera kuvuka.
Uyu munyapolitiki abishingira ahanini ku myemerere ye y’uko Perezida Tshisekedi n’ubwo ayoboye igihugu, atigeze atsinda amatora, ko ahubwo Kabila ari we wamushyize ku butegetsi.
Ashingiye kuri iyi mpamvu, yagize ati: “Igipupe gihora ari igipupe. Ihuriro Ryera ni inda ya kabiri. Mushingira kuki muvuga ko batandukanye? Turebe ku masezerano ya Kingakati.”
Fayulu yabwiye abari muri iki kiganiro ko atarwanya ubutegetsi bwa Tshisekedi, ahubwo arwanya imikoranire ye na Kabila yemeza ko ikiriho, ati: “Turamagana imikoranire iri hagati ya Tshisekedi ya Kabila.”
Ishyaka ECIDé rya Fayulu ritavuga rumwe n’ubutegetsi risigaye mu ihuriro LAMUKA abereye umuhuzabikorwa, hamwe na PALU rya Adolphe Muzito. Irya Moise Katumbi na Jean Pierre Bemba yamaze kwihuza n’Ihuriro Ryera rya Tshisekedi nyuma yo gushima icyerekezo cyaryo.
