Umunyamabanga Mukuru w’Umuryango Mpuzamahanga wita ku buzima (OMS), Dr. Tedros Adhanom Ghebreyesus yatangaje ko muri Guinea habonetse abantu babiri bakekwaho icyorezo cya Ebola.
Yabitangarije kuri Twitter kuri uyu wa 13 Gashyantare, agira ati: “WHO (OMS) yamenyeshejwe ko hari abantu babiri bakekwaho Ebola muri Guinea-Conakry. Ibipimo bibyemeza biri gukorwa.”
Nta cyavuye muri ibi bipimo uyu muryango uratangaza, gusa ngo ishami ryawe ku mugabane wa Afurika ryiri kwitegura guhangana n’iki cyorezo.
Iki cyorezo giherutse kuboneka no muri Repubulika ya Demukarasi ya Congo (RDC), aho uku kwezi gutangira, hagaragaye abakirwaye babiri nyuma y’igihe kirekire byari bizwi ko kitakiriyo. Aba barwayi babonetse muri Ntara ya Kivu y’Amajyaruguru, bombi barapfuye.
Ebola yigeze kwibasira umugabane wa Afurika kuva mu 2014 kugeza mu 2016 mu bihugu nka Guinea, Sierra Leone, Mali, Nigeria na Liberia; handura abarenga 28,000, hapfa abarenga 11,000.
RDC ni cyo gihugu giheruka kugaragaramo iki cyorezo mu gihe cya vuba nk’uko OMS ibyerekana; aho kuva muri Kanama 2018 kugeza muri Kamena 2020, cyisheyo abarenga 2200.
