Inzego z’umutekano mu Burundi zirimo guhiga umusore w’Imbonerakure (urubyiruko rw’ishyaka CNDD-FDD) ushinjwa kwambura umwe mu Barundi batatu bari bagiye kujya muri Repubulika iharanira Demokarasi ya Congo yarangiza akamuroha mu ruzi rwa Rusizi.
Abo Barundi batatu bashakaga kujya muri Repubulika iharanira Demokarasi ya Congo banyuze ku ruzi rwa Rusizi, batewe n’umwe mu bagize ishyaka riri ku butegetsi mu Burundi. Umwe muri bo yishwe no kurohama.
Ababibonye, bavuga ko umusore w’Imbonerakure yabanje kumwambura amafaranga mbere yo kumujugunya muri Rusizi, ahitwa Kaburantwa, muri Komini Buganda, mu Ntara ya Cibitoke nk’uko tubikesha SOS Médias Burundi.
Nyakwigendera witwa Elisha Ngomirakiza yishwe mu ijoro ryo kuwa Kane ahagana saa tanu nk’uko bitangazwa n’abaturage. Nyuma yo kurohamisha uyu, iyi Mbonerakure yahise icika polisi ita muri yombi umugore we.
Abaturage bati “ Turasaba ko atabwa muri yombi agashyikirizwa ubutabera,”
Abandi bagabo babiri bari bari kumwe na nyakwigendera, babashije gucika, bavuga ko bari bagiye gushakisha imirimo muri Kivu y’Amajyepfo. Abaturage ba Cibitoke bakaba bakunze kujyayo bagiye muri urwo rwego rwo gushaka imirimo, mu gihe abandi bahafite imirima baba bagiye guhinga.
Ku itariki 20 Mutarama 2021, izindi Mbonerakure eshatu zo muri iyi Komini ya Buganda zakatiwe imyaka itatu y’igifungo nyuma yo kuzihamya ibyaha birimo guhungabanya umutekano w’igihugu, kwambura no gukorera iyicarubozo Abarundi baba bavuye mu buhungiro muri Congo banyuze ku ruzi rwa Rusizi rutandukanya u Burundi na Repubulika iharanira Demokarasi ya Congo.
Guverineri wa Cibitoke, Carême Bizoza, yaburiye abayobozi b’inzego z’ibanze n’insoresore z’Imbonerakure zifata nabi abaturage, Abarundi n’abanyamahanga bambuka uruzi rwa Rusizi.
Umuyobozi muri polisi we ati “ Bagomba kumva ko ibintu byahindutse. Uzafatwa azahanwa by’intangarugero.”
