Abajenerali babiri bo mu mutwe wa FLN bari mu bantu 21 bari kuburanishwa n’Urukiko Rukuru ruburanisha ibyaha mpuzamahanga n’ibyambukiranya imipaka basabye kurekurwa by’agateganyo mu gihe umwe muri bo ari ku rutonde rw’abafatiwe ibihano n’Umuryango w’Abibumbye.
Aba ni Maj. Gen. Felicien Nsanzubukire na Maj. Gen. Anastase Munyaneza, bo muri FLN-MRCD, aho bakurikiranweho ibyaha bitandukanye bifitanye isano n’iterabwoba.
Aba bari abayobozi bakuru muri uyu mutwe w’inyeshyamba wagabye ibitero bitandukanye ku butaka bw’u Rwanda byahitanye abantu 9 mu 2018 abandi bagakomereka.
Maj. Gen. Nsanzubukire ari ku rutonde rw’abantu bafatiwe ibihano n’Akanama k’Umutekano ka Loni kubera ibyaha yakoreye muri Repubulika iharanira Demokarasi ya Congo ubwo yari akibarizwa mu mutwe wa FDLR yavuyemo akajya muri FLN-MRCD nk’uko tubikesha The New Times.
Mu rukiko kuri uyu wa Gatanu, uwunganira aba bagabo, Herman Twajamahoro, yavuze ko abakiriya be bakoranye n’ubutabera kuva bafatwa n’igihe bagarurwaga mu Rwanda mu 2017.
Yagize ati “ Abakiriya banjye bakoranye n’abashinzwe iperereza bihagije, umwe muri bo (Nsanzubukire) ararwaye cyane kandi akeneye kwitabwaho n’abaganga. Ndasaba mu izina ryabo ko barekurwa bakaburana badafunze.”
Mu rukiko Nsanzubukire yagargaraga nk’unaniwe kandi agendera ku kabando.
Umwunganizi wabo avuga ko abakiriya be biteguye kubahiriza ibyo bazabuzwa byose.
Uyu kandi yagaragarije urukiko impungenge z’abakiriya be z’uko basubijwe mu Rwanda bakuwe muri Repubulika iharanira Demokarasi ya Congo binyuze mu nzira zinyuranyije n’amategeko kandi ngo ibi bigomba gutuma urukiko rubarekura by’agateganyo.
Ibi ariko ubushinjacyaha bwabiteye utwatsi buvuga ko batirukanwe basubizwa mu Rwanda (Extradition) ahubwo bacyuwe (Repatriation) nyuma yo gufatirwa ku rugamba.
Ubushinjacyaha bwavuze ko bacyuwe binyuze ku bufatanye n’urwego rwa Loni rushinzwe kwambura intwaro, gusezerera mu gisirikare no gucyura abahoze mu nyeshyamba.
Kurikira ibiganiro n’amavidewo binyura kuri Bwiza TV
