Minisiteri y’Ubuzima (MINISANTE) igaragaza ko tariki ya 5 n’iya 6 Werurwe 2021 Abaturarwanda 158,898 bamaze gukingirwa icyorezo cya Covid-19.
Aba barimo 75,056 bakingiwe tariki ya 5 (umunsi wa mbere w’ikingira) n’83,842 bakingiwe tariki ya 6 Werurwe 2021.
Bigaragara ko mu Mujyi wa Kigali hmaze gukingirwa Abaturarwanda 6,062, mu Ntara y’Amajyaruguru hamaze gukingirwa 31,286, mu Ntara y’Amajyepfo hamaze gukingirwa 42,614, mu Ntara y’Iburasirazuba hamaze gukingirwa 39,499 naho mu Ntara y’Iburasirazuba hamaze gukingirwa 39,437.
Imibare igaragaza abapimwe mu gihugu hose kugeza tariki ya 6 Werurwe 2021
Nk’uko MINISANTE ibigaragaza, abakingiwe ku munsi wa mbere ni abarusha abandi ibyago byo kwandura iki cyorezo cyangwa kuzahazwa nacyo harimo abakozi b’ibigo ndetse n’abakangurambaga b’ubuzima.
Abakingiwe ku munsi wa kabiri barimo abarimu mu byiciro by’abarusha abandi ibyago byo kwandura Covid-19; aho hibanzwe ku benda kugeza imyaka 65 y’amavuko, abarwaye indwara zidakira ndetse n’abafite ubumuga.
Biteganyijwe ko iki cyumweru kirangira hamaze gukingirwa 25% by’abarimu 98,000 igihugu gifite.
Abanyarwanda bafite imyaka 65 y’amavuko kuzamura na bo barakingiwe, barimo Intwaza zituye mu ngo z’Impinganzima ziherereye mu turere twa Bugesera, Huye, Nyanza na Rusizi.
Imibare ya MINISANTE yo kuri uyu wa 6 Werurwe 2021 igaragaza ko abantu 19,509 ari bo bamaze kwandura iki cyorezo kuva cyagera mu Rwanda muri Werurwe 2020, babonetse mu bipimo (tests) 1,034,869. Abamaze kugikira ni 17,810, abo cyishe ni 267 naho abakikirwaye ni 1,442.
Abanduye, abapimwe, abishwe, abakize ndetse n’abakirwaye Covid-19 kuva yagera mu Rwanda
Kurikira ibiganiro n’amavidewo binyura kuri Bwiza TV
