Igitangazamakuru Nation cyo muri Kenya mu ijoro ryo kuri uyu wa 9 Werurwe 2021 cyaraye gitangaje ko umwe mu bayobozi b’ibihugu bya Afurika arwariye mu bitaro by’i Nairobi muri Kenya.
Nation yirinze gutangaza amazina y’uyu muyobozi “kubera ko abayobozi muri guverinoma banze kwemera” ko uyu koko yaba arwaye.
Ku rundi ruhande, umunyapolitiki utavuga rumwe n’ubutegetsi bwa Tanzania, Tundu Lissu yaraye yanditse ubutumwa kuri Twitter, agaragaza ko Perezida w’igihugu cye, Dr. John Pombe Magufuli ari we urembeye i Nairobi.
Lissu yagize ati: “Ubuzima bwa Perezida ni ikibazo kireba rubanda. Ubwo Kikwete yabagwaga prostate twarabimenyeshejwe. Ubwo Mkapa yajyaga guhindurirwa igufwa ryo ku kibuno, ntabwo twahejejwe mu kizima. Ubwo Mwalimu yarwaraga Leukemia, twarabimenyeshejwe. Ni iki Magufuli yabaye kitari ngombwa ko tumenya?”
Mu rukerera, Lissu yanditse ubundi butumwa kuri Twitter avuga ko Magufuli yaba yajyanwe muri Kenya arembejwe na Covid-19, avuga ko byaba biteye isoni kuri Leta n’uburyo yatangaje kenshi ko iki cyorezo cyatsindwa binyuze mu masengesho no mu miti gakondo.
Si uyu munyapolitiki gusa wavuze ko ari Magufuli urembeye muri Kenya kuko n’umuryango Fichua Tanzania uharanira uburenganzira bwa muntu muri iki gihugu urabyemeza ushingiye ku makuru ya mwarimu muri Kaminuza ya Birmingham mu Bwongereza, Prof. Nicholas Drew Cheeseman usanzwe ari impirimbamyi ya demukarasi.
Prof. Cheeseman yatangarije kuri Twitter ati: “Inkuru Ishyushye: Biravugwa ko Perezida Magufuli wa Tanzania arembye. Mu minsi ibiri ishize abantu babiri bambwiye ko arwaye Covid-19 ariko adashaka kujya mu bitaro kubera ko bidakomeye. Rero ntimutekereze ko Leta itanga itangazo…” Yongeye ati: “Ubu byemejwe ko Perezida Magufuli ari mu bitaro muri Kenya.”
Perezida Magufuli yakunze gutangaza ko icyorezo cya Covid-19 kitari muri Tanzania ndetse we ntiyigeze agaragara acyirinda. Yemeye ko ibikorwa byose bikomeza mu gihugu, atangaza ko amasengesho, imiti n’ubwirinzi gakondo byabafasha gutsinda iki cyorezo.
Kurikira ibiganiro n’amavidewo binyura kuri Bwiza TV
