Perezida wa Repubulika y’u Rwanda, Paul Kagame n’umufasha we, Jeannette Kagame kuri uyu wa 11 Werurwe 2021 bakingiwe icyorezo cya Covid-19.
Nk’uko ibiro by’Umukuru w’Igihugu (Village Urugwiro) byabitangaje, iki gikorwa cyabereye ku bitaro byitiriwe Umwami Faisal, i Kigali.
Village Urugwiro ku rubuga rwa Twitter yagize iti: “Muri gahunda yo gukingira ikomeje hirya no hino mu gihugu aho abarenga 230,000 bamaze gufata urukingo rwa Covid-19, Perezida Kagame n’umufasha Jeannette Kagame bakingiriwe inkingo ku bitaro byitiriwe Umwami Faisal.”
Ubwo Umukuru w’Igihugu yakingirwaga Covid-19
Umufasha w’Umukuru w’Igihugu na we yakingiwe
U Rwanda rwakiriye bwa mbere doze 342,000 z’inkingo za Covid-19 tariki ya 3 Werurwe 2021, gahunda yo gukingira mu gihugu hose itangira tariki ya 5. Minisiteri y’Ubuzima yatangaje ko kugeza kuri uyu wa 10 Werurwe hamaze gukingirwa abarenga 230,000.
Uyu munsi, gahunda yo gukingira yakomeje nk’uko bigaragara. Abagenewe iyi gahunda ni: abamotari, abakozi b’amahoteri azakira inama y’Abakuru b’Ibihugu y’umuryango Commonwealth izwi nka CHOGM, abakozi bo mu bigo by’ubuvuzi byigenga n’abasheshakanguhe mu bigo nderabuzima.
Kurikira ibiganiro n’amavidewo binyura kuri Bwiza TV
