Umunyapolitiki utavuga rumwe n’ubutegetsi bwa Tanzania, Tundu Lissu avuga ko Perezida Dr. John Pombe Magufuli yavanwe muri Kenya aho byavugwaga ko yari arwariye, ajyanwa mu Buhinde ari muri ‘coma’.
Yabitangarije ibiro ntaramakuru by’Abongereza (Reuters) abibwira ko ari amakuru yakuye ku baganga n’abashinzwe umutekano muri Kenya, “gusa ntiyatanga igihamya”.
Lissu yakomeje abwira ibi biro ko Perezida Magufuli “ari muri coma kuva ejo hashize.”
Reuters yashatse kumenya icyo Leta ya Tanzania ibivugaho, ibaza Umuvugizi wa Perezida Magufuli, Gerson Msigwa ndetse n’Umuvugizi wa Guverinoma, Hassan Abbas, ntibayisubiza.
Yabajije Minisiteri y’Ububanyi n’Amahanga y’u Buhinde na Ambasade yayo muri Kenya, nabwo ntiyasubizwa.
Amakuru y’uburwayi bwa Perezida Magufuli yatangiye kuvugwa mu bitangazamakuru no ku mbuga nkoranyambaga guhera ku mugoroba wa tariki ya 9 Werurwe 2021, bivugwa ko arembejwe na Covid-19 ndetse ko yihutishirijwe mu bitaro byo muri Kenya.
Kurikira ibiganiro n’amavidewo binyura kuri Bwiza TV
