Igipolisi cyo mu Bwongereza cyatangije iperereza ku birego bishinja Asma al-Assad, umugore wa Perezida wa Syria, Bashar al-Assad gushoza no gushishikariza ibikorwa by’iterabwoba muri Syria.
Asma al-Assad, usanzwe ufite ubwenegihugu bw’u Bwongereza n’ubwa Syria, ashobora kwamburwa ubu bwenegihugu bw’u Bwongereza mu gihe yahamwa n’icyaha nk’uko bitangazwa n’ibinyamakuru byo mu Bwongereza.
Igipolisi cy’u Bwongereza kuri iki Cyumweru, itariki 14 Werurwe, cyatangarije ikinyamakuru Sky News, ko cyakiriye ikirego muri Nyakanga mu mwaka ushize gifitanye isano n’amakimbirane akomeje muri Syria.
Itangazo ryashyizwe ahagaragara n’Igipolisi cy’u Bwongereza rivuga ko iki kibazo kiri kwitabwaho n’ishami rishinzwe ibyaha byo mu ntambara.
Ibirego bishinjwa al-Assad byatanzwe n’inzu mpuzamahanga y’abanyamategeko yitwa Guernica 37 ikunze kwibanda ku manza z’amahanga zerekeye kubahiriza uburenganzira bw’ibanze bwa muntu.
Guernica 37 mu itangazo yasohoye kuri website yayo yagize iti “Iyi ni intambwe y’ingenzi mu kubaza abayobozi bakuru ba politiki ibyo bakoze no kureba ko igihugu, binyuze mu nzira y’amategeko yigenga kandi itabogamye, gifata inshingano z’ibikorwa by’abenegihugu bacyo”.
Bakomeza bagira bati “Kubera ko ari umwenegihugu w’u Bwongereza, ni ngombwa ko akurikiranwa niba hari ibimenyetso bishyigikira iki kirego kandi atari ukumwambura ubwenegihugu gusa. Iyi ni inzira y’ingenzi kandi birakwiye ko ubutabera butangwa imbere y’urukiko rwo mu Bwongereza”.
Perezida Assad n’umugore we ubwo bahuraga n’Umwamikazi Elisabeth
Toby Cadman, washinze Guernica 37, yabwiye Al Jazeera dukesha iyi nkuru ko umugore wa perezida wa Syria yagize uruhare mu byaha aregwa.
Ati “Icyo akekwaho gukora ni ugushishikariza ibikorwa byavuyemo imfu muri Siriya. Guhura n’ingabo, kuvugira mu ruhame, guhimbaza imyitwarire y’ingabo zahitanye igice cya miliyoni no gukoresha intwaro z’ubutabire n’ubundi bwoko bw’intwaro zibujijwe. Ntabwo ari umugore wa perezida gusa, ibyo tuvuga ni uko yiyamamaje kandi akagira uruhare muri ibyo byaha bityo akaba agomba guhura n’ubutabera.”
Intambara yo muri Syria yatangiye kuva mu 2011 imaze kugwamo abantu bagera mu 500,000, mu gihe ababarirwa mu mamiliyoni bavanwe mu byabo, bamwe bagahunga igihugu.
Kurikira ibiganiro n’amavidewo binyura kuri Bwiza TV
