Kuva kuri uyu wa Gatanu ibihugu bitandukanye byo ku mugabane w’Uburayi birasubukura igikorwa cyo gukingira abaturage babyo COVID-19 byifashishije urukingo rwa AstraZeneca, nyuma y’igihe byarahagaritse uru rukingo.
AFP yavuze ko ba Minisitiri b’Ubuzima mu bihugu by’Ubutaliyani n’Ubudage bayitangarije ko ibikorwa byo gukingira hifashishijwe urukingo rwa AstraZeneca bisubukurwa kuri uyu wa Gatanu.
Ku wa Gatanu kandi Ubufaransa na bwo burasubukura ikingira nk’uko byemejwe na Minisitiri w’Intebe wabwo, Jean Castex; mu gihe Minisitiri w’Ubuzima wa Espagne we yatangaje ko iki gihugu kizasubukura ibikorwa byo gukingira ku wa Gatatu w’icyumweru gitaha.
Ibi bihugu byavuye ku izima nyuma y’igenzura ryakozwe n’ikigo kigenzura imiti cy’Abongereza (MHRA) na EMA gikora ubugenzuzi mu muryango w’Ubumwe bw’Uburayi, rikagaragaza ko urukingo rwa AstraZeneca rwizewe.
Kuva mu cyumweru gishize no mu ntangiriro z’iki ibihugu bitandukanye byiganjemo ibyo ku mugabane w’Uburayi byari byatangiye guhagarika gukoresha urukingo rwa AstraZeneca, nyuma y’uko bimwe mu bihugu bitandukanye bigaragaje ko hari bamwe mu baturage bagize ikibazo cyo kuvura kw’amaraso nyuma yo guterwa ruriya rukingo.
Ikigo MHRA na EMA byavuze ko abantu bakwiye kugirira icyizere inyungu z’urukingo rwa AstraZeneca kandi bakarukoresha bikingiza, batitaye ku kuba hari ibihugu byaruhagaritse.
Dr June Raine, umuyobozi-nshingwabikorwa wa MHRA, aganira n’itangazamakuru mu kiganiro cyayobowe na Minisitiri w’Intebe w’Ubwongereza, Boris Johnson, yavuze ko abagenzuzi bazakomeza gukurikiranira hafi uko byifashe, agira inama abantu bashobora kugira ikibazo nyuma yo gufata ruriya rukinho kugana inzego z’unuzima.
Dr June Raine yibukije abantu kandi ko bari bakwiye gukingirwa, kuko inyungu z’urukingo zisumba ingorane zose zishobora guterwa na rwo.
Kurikira ibiganiro n’amavidewo binyura kuri Bwiza TV
