Perezida w’u Burundi, Evariste Ndayishimiye, umufasha we n’itsinda ririmo abagize guverinoma bagiriye uruzinduko rw’akazi mu Misiri kuri uyu wa 23 Werurwe 2021.
Itangazo ryasohowe n’Umuyobozi w’Ibiro by’Umukuru w’Igihugu, Ambasaderi Willy Nyamitwe rivuga ko itsinda ry’abayobozi ryajyanye na Perezida Ndayishimiye mu Misiri rigizwe na bane mu bagize Guverinoma ndetse n’abandi 10 bikorera ku giti cyabo.
Bagiyeyo bitabiriye ubutumire bwa Perezida wa Misiri, Abdel Fattah Al-Sissi, bakaba bagiye kugirana ibiganiro birebana n’umubano w’ibihugu byombi.
Mu kiganiro Perezida Ndayishimiye azagirana na Al-Sissi nk’uko iri tangazo rikomeza ribivuga, azaboneraho umwanya wo gutumira abashoramari bo muri Misiri gushora imari mu Burundi.
Uru ruzinduko ruzarangira tariki ya 26 Werurwe 2021 rubaye urwa kane Perezida Ndayishimiye agiriye mu mahanga kuva yatangira kuyobora u Burundi tariki ya 18 Kamena 2020.
Yabanje gusura Tanzania muri Nzeri 2020, akurikizaho Guinée Equatoriale mu ntangiriro z’Ugushyingo 2020, aheruka muri Gabon mu mpera z’Ugushyingo 2020.
Kurikira ibiganiro n’amavidewo binyura kuri Bwiza TV
