Minisiteri y’Ubuzima yatangaje ko muri gahunda yo gukingira icyorezo cya Covid-19, urukingo rwa kabiri rwa Pfizer-BioNTech ruzatangwa guhera tariki ya 2 kugeza tariki ya 21 Mata 2021.
Iyi gahunda igenewe abahawe urukingo rwa Pfizer ku nshuro ya mbere nk’uko Minisiteri y’Ubuzima ikomeza ibivuga. Yagize iti: “Minisiteri y’Ubuzima iramenyesha Abanyarwanda ko kuva ku wa 02 Mata 2021 kugeza ku wa 21 Mata 2021 hateganyijwe gahunda yo gutanga urukingo rwa kabiri ku bahawe urukingo rwa Pfizer.”
Abahawe urukingo rwa AstraZeneca bo baramenyeshwa gahunda yo kubaha urundi mu minsi iri imbere.
Tariki ya 3 Werurwe 2021 ni bwo u Rwanda rwakiriye izi nkingo zirmo 240,000 za AstraZeneca n’102,000 za Pfizer-BioNTech. Gahunda y’icyiciro cya mbere cy’ikingira yatangiye tariki ya 5, irangira hakingiwe ababarirwa mu 290,000.
Inzego zishinzwe ubuzima zivuga ko uwahawe urukingo rwa AstraZeneca ku nshuro ya mbere, atagereza guhabwa urundi nyuma y’ibyumweru biri hagati y’8 na 12, mu gihe uwahawe Pfizer ategereza nyuma y’iminsi 21 na 28.
Kurikira ibiganiro n’amavidewo binyura kuri Bwiza TV
