Abakinnyi b’Ikipe y’igihugu ya Gambia ku wa kabiri bakiriwe nk’abanyacyubahiro i Banjul, nyuma yo gutsindirwa i Kinshasa na RD Congo igitego 1-0, ariko bakabona itike y’Igikombe cya Afurika.
Ni ku nshuro ya mbere mu mateka Gambia igiye kwitabira Igikombe cya Afurika cy’ibihugu.
Ku wa Mbere Abakongomani batsinze Gambia igitego 1-0 cya Kazadi Kasengu kuri penaliti, gusa ntacyo cyigeze kibamarira bijyanye n’uko bari barasezerewe nyuma yo kunyagirwa na Gabon ibitego 3-0.
Ibi biranajyana no kuba Gambia yaragiye i Kinshasa yaramaze kwizera itike, nyuma yo gutsinda Angola igitego 1-0 mu mukino wa gatanu wo mu tsinda D.
Ubwo abakinnyi ba Gambia bururukaga mu ndege i Banjul ku wa Kabiri, basanze basasiwe itapi itukura (Tapis Rouge/ Red Carpet) mu busanzwe inyuraho abakuru b’ibihugu, mu rwego rwo kubashimira ku kuba barahesheje igihugu ishema.
Aba bakinnyi kandi bakirijwe impano zitandukanye zirimo indabyo.
Gambia yarangije imikino y’amajonjora iri ku mwanya wa kabiri mu tsinda D n’amanota 10 yanganyaga na Gabon ya mbere, gusa bagatandukanywa n’umubare w’ibitego barushanyaga.
Kurikira ibiganiro n’amavidewo binyura kuri Bwiza TV
