Abantu barindwi nibo bamaze gupfa mu Bwongereza bitewe no kwibumba kw’amaraso nyuma yo guhabwa urukingo rwa AstraZeneca nk’uko byatangajwe n’ikigo gishinzwe imiti muri iki gihugu.
Ibi bije nyuma y’aho mu minsi ishize hakomeje kugaragara abantu bakeya bagizwe ingaruka zo kwibumba kw’amaraso nyuma yo guhabwa uru rukingo ndetse mu bihugu bimwe na bimwe bakaba bari bahagaritse kurukoresha.
Urubuga rwa BBC dukesha iyi nkuru ruvuga ko kugeza ku itariki 24 Werurwe mu bantu babarirwa muri miliyoni 18 bari bamaze guhabwa uru rukingo, abagera kuri 30 ari bo bari bamaze guhura n’iki kibazo cyo kwibumba kw’amaraso.
Ishami ry’Umuryango w’Abibumbye ryita ku Buzima, OMS, n’ishyirahamwe ry’u Burayi rishinzwe imiti ariko byavuze ko inyungu z’uru rukingo runakoreshwa mu Rwanda ziruta kure ingaruka rushobora kugira.
Umuvugizi wa AstaZeneca we ati “ Ubuzima bw’abantu nicyo kintu dukomeza gushyira imbere.”
Impuguke n’abashinzwe kugenzura imiti ku Isi kuri ubu barimo bari gushakisha niba uru rukingo ari rwo koko rutera ikibazo cyo kwibumba kw’amaraso n’inkurikizi ku mugambi wo gukingira.
Kurikira ibiganiro n’amavidewo binyura kuri Bwiza TV
