Nyuma y’iminsi itanu Ikigega Mpuzamahanga cy’Imari (IMF) gitangaje ko kigiye guha Leta ya Kenya inguzanyo ya miliyari 2.34 y’amadolari ya Amerika yo kuyifasha guhangana n’ingaruka za Covid-19, Abanyakenya babarirwa mu 211,000 bamaze kugisaba kuyihagarika mu maguru mashya.
Tariki ya 2 Mata 2021 ni bwo IMF yatangarije kuri Twitter na Facebook ko Inama y’Ubutegetsi yayo yemeje guha Leta ya Kenya iyi nguzanyo tariki ya 21 Mata. Kuva icyo gihe Abanyakenya bakoresha izi mbuga batangiye kuyibasira, bavuga ko bitumvikana ukuntu yatanga inguzanyo ya kabiri mu gihe n’iya mbere itarishyurwa.
Imibare aba Banyakenya batanze yerekana ko kuva tariki ya 20 Mata 2020 kugeza tariki ya 21 Werurwe 2021 iyi Leta imaze gufata inguzanyo yaturutse mu bigo n’imiryango mpuzamahanga ndetse n’ibihugu bitandukanye; yose hamwe ingana na miliyari 4.1 z’amadolari ya Amerika.
Abanyakenya bashingiye ku kuba batarishyura inguzanyo zabanje no kuba bashinja abayobozi kuzinyereza ntizikoreshwe icyo zagenewe, bifashishije urubuga Change.org, basaba IMF ko kuri iyi nshuro yakwisubiraho, ikayihagarika.
Soma iyi nkuru bifitanye isano http://www.bwiza.com/?Abanyakenya-bibasiye-IMF-ikomeje-guha-Leta-inguzanyo
Kugeza mu gitondo cy’uyu wa 7 Mata 2021, bigaragara ko aba babarirwa mu 211,000 ari bo amaze gushyira imikono kuri uru rubuga, basaba ko inguzanyo ihagarikwa gusa ntibizwi niba iki kigega gishobora kubahiriza ubusabe bwabo.
Ni ubwa kabiri IMF igiye guha inguzanyo Leta ya Kenya igamije kuyifasha guhangana n’ingaruka za Covid-19. Ubwa mbere (tariki ya 20 Gicurasi) yayihaye miliyoni 739 z’amadolari ya Amerika.
Kurikira ibiganiro n’amavidewo binyura kuri Bwiza TV
