Brazil: Abarenga 4000 bishwe na Covid-19 mu munsi umwe

France 24 dukesha iyi nkuru ivuga ko uyu ari wo mubare munini w’abaturage bishwe n’iki cyorezo mu munsi umwe, kuva cyagera muri Brazil. Iki ni nacyo gihugu kandi kibonetsemo umubare munini w’abapfuye mu munsi umwe.

Iki gitangazamakuru cyagaragaje ko imwe mu mpamvu zikomeye zituma umubare w’abapfa n’abandura ukomeza kuzamuka ari uburangare bw’Umukuru w’Igihugu, Perezida Jair Bolsonaro utarigeze afata ingamba zo kukirwanya.

Abahanga mu by’ubuzima bakomeje guterwa impungenge n’uko iki cyorezo gihagaze muri Brazil barasaba Leta ko byibuze yemera gufata ingamba zirimo no gushyiraho gahunda ya Guma mu Rugo, kugira ngo ikwirakwira ry’iki cyorezo rigabanyuke.

Muganga Ehel Maciel uvurira mu bitaro bya kaminuza y’igihugu ya Esprito Santo yabwiye AFP ati: “Turi mu bihe bikomeye, kandi nta n’ingamba tubona Leta ifata. Abantu 10% ni bo bamaze guhabwa doze ya mbere y’urukingo, uburyo bushoboka bwo kugabanya ikwirakwira ryihuse ni ugushyiraho Guma mu Rugo byibuze mu gihe cy’iminsi 20.”

Uyu muganga yakomeje ati: “Ikibazo ni politiki itugejeje aho turi uyu munsi. Abantu benshi biswe na Covid-19, biteye agahinda.”

Abantu miliyoni 13 ni bo amaze kwandura Covid-19 muri Brazil, muri bo hakaba hamaze gupfa ibihumbi 337. Ukwezi kwa Werurwe 2021 kwapfuyemo abarenga ibihumbi 66 bikaba bigaragara ko iki cyorezo gikomeje gukaza umurego. Abaganga bo muri iki gihugu, bavuga ko abarwayi bakomeje kuzura ibitaro.

Kurikira ibiganiro n’amavidewo binyura kuri Bwiza TV