Abantu bitwaje intwaro bishe abasirikare 10 n’umuyobozi muri Leta ya Benue iherereye hagati muri Nigeria.
“Ingabo za Nigeria zikorera muri Leta ya Benue zagabweho igitero igihe zari mu kazi gasanzwe,” uyu ni umuvugizi w’igisirikare, Mohammed Yerima mu itangazo ryo kuri uyu wa Gatanu ritasobanuye byinshi ku gihe iki gitero cyabereye.
Igisirikare cya Nigeria cyavuze ko kirimo kugerageza gukurikirana abagabye iki gitero nk’uko iyi nkuru dukesha Al Jazeera ikomeza ivuga.
Ntabwo abari inyuma y’iki gitero bahise bamenyekana, ariko Leta ya Benue ni imwe mu bice bya Nigeria, bikunze kugaragaramo abagizi ba nabi bitwaje intwaro bazifashe nyuma y’imyaka y’amakimbirane hagati y’aborozi n’abahinzi.
Mu kwezi gushize, Guverineri wa Leta ya Benue, Samuel Ortom, yavuze ko nawe yarokotse igitero cy’abashumba bitwaje intwaro ubwo yari mu nzira ari mu rugendo.
Amakimbirane akunze kugwamo abantu hagati y’aborozi b’Aba-Fulani n’abahinzi bapfa ubutaka, aho kuragira n’amazi bivugwa ko amaze imyaka myinshi agaragara muri iki gice cyo hagati muri Nigeria.
Kurikira ibiganiro n’amavidewo binyura kuri Bwiza TV
