Umuryango w’ubukungu w’ibihugu byo muri Afurika yo hagati (SADC) wemeye kohereza umutwe w’ingabo zishinzwe gutabara byihuse (FIB) gufasha igihugu cya Mozambique guhashya umutwe w’iterabwoba ukorana na Islamic State ukomeje guca ibintu mu majyaruguru y’igihugu.
Mu itangazo ryasohowe mu Nama idasanzwe y’uyu muryango kuri uyu wa Kane ushize ninjoro, SADC yagaragaje ko yiteguye gufatanya na Guverinoma ya Mozambique mu ngufu irimo gushyira mu kugarura amahoro, kuzana amahoro arambye, ubwiyunge n’iterambere.
Inama yategetse kohereza mu buryo bwa tekiniki urwego rwa SADC muri Repubulika ya Mozambique no gutumiza inama idasanzwe ya komite y’abaminisitiri y’urwego mbere y’itariki ya 28 Mata 2021, ikaba igomba gutanga raporo mu nama idasanzwe y’umuryango izabera muri Repubulika ya Mozambique ku ya 29 Mata 2021.
Nk’uko tubikesha urubuga rwa journaldebrazza, SADC yasabye abayobozi b’ingabo n’inzego z’umutekano mu bihugu 16 bigize umuryango gutangira gutegura iyoherezwa ry’umutwe w’ingabo uhuriweho ugomba koherezwa muri Mozambique.
Uyu mutwe niwoherezwa, Mozambique izaba ibaye igihugu cya kabiri muri SADC cyoherejwemo FIB, nyuma ya Repubulika iharanira Demokarasi ya Congo.
Iki cyemezo cyafashwe nyuma y’ibitero bimaze iminsi byibasira abasivili n’ibikorwa bya guverinoma bikorwa n’umutwe uzwi muri iki gihugu nka Al-Shabab, ariko udafite aho uhuriye na Al-Shabab yo muri Somalia.
Kurikira ibiganiro n’amavidewo binyura kuri Bwiza TV
