Urukingo rwa Covid-19 ikigo cy’Umuryango wa Afurika Yunze Ubumwe (AU) gishinzwe gukumira indwara, Africa CDC, cyari gitezeho amakiriro, rwabaye ruhagaritswe by’agateganyo bitewe n’ingaruka zo kuvura kw’amaraso zagaragaye ku barutewe.
Uru rukingo ni urwakozwe n’ikigo Johnson & Johnson (J&J) cyo muri Leta Zunze Ubumwe z’Amerika (USA) kizwiho gukora imiti n’inkingo z’indwara zitandukanye.
Kuri uyu wa 13 Mata 2021 ni bwo ikigo cyo muri USA gishinzwe gukumira indwara (CDC) hamwe n’igishinzwe kugenzura ubuziranenge bw’imiti n’inkingo (FDA) byahagaritse uru rukingo bitewe n’abantu 6 mu barutewe barenga miliyoni 6 bari bamaze kugaragaza ukuvura kw’amaraso, umwe muri bo akahasiga ubuzima.
Iki cyemezo kandi cyahise gifatwa n’ibihugu bigize Umuryango w’Ubumwe bw’u Burayi (EU) hamwe na Afurika y’Epfo, nabyo byari byaratangiye kurukingiza abaturage babyo.
AU yahagaritse kugura AstraZeneca, ijya mu biganiro byo kugura J&J
Dr John Nkengasong uyoboye Africa CDC tariki ya 8 Mata 2021 yatangarije Financial Times ko AU yahagaritse gahunda yo kugura inkingo za AstraZeneca zikorwa n’ikigo Serum cyo mu Buhinde, ikaba yaratangiye ibiganiro byo kugura urwa J&J.
Dr Nkengasong yasobanuye ko impamvu uyu muryango wahagaritse kugura AstraZeneca ari uko bigoye kuzibona, kandi AU ishaka gukingira abatuye Afurika benshi, bagera ku kigero cya 60%.
Yavuze ko umuryango mpuzamahanga ushinzwe ubuzima, OMS, muri gahunda ya Covax igamije kugeza inkingo mu bihugu biri mu nzira y’iterambere n’ibikennye, usanzwe ukorana na AstraZeneca, bityo iki cyemezo kikaba cyarafashwe kugira ngo AU na OMS byirinde kubyiganira ku rukingo rumwe, narwo rutaboneka uko bikwiye.
Yagize ati: “Intego yacu ni ugukingira 60%. Niba Covax izadufashaho 20%, dushobora gukomeza gushaka izindi nkingo zo kongeraho. Niba Covax iri gukorana na AstraZeneca ngo ibone dose ikeneye, dushobora kumvikana na Johnson & Johnson kugira ngo tubone izisigaye.”
Johnson & Johnson irateganya kugurisha AU doze miliyoni 400 z’inkingo zayo. Uyu mubare wa doze ni wo uyu muryango watagenyaga gukura muri Serum muri Mutarama 2021, wagombaga kwiyongera kuri doze miliyoni 270 wari waramaze kubona.
Kurikira ibiganiro n’amavidewo binyura kuri Bwiza TV
