Perezida wa Leta Zunze Ubumwe za Amerika, Joe Biden, yemeye ku mugaragaro ko ubwicanyi rusange bwakorewe Abanyarumeniya mu bwami bwa Ottoman mu gihe cy’Intambara ya Mbere y’Isi Yose ari “Jenoside”, igikorwa cyahise cyamaganwa na Turkiya.
Mu ijambo rye, ku wa Gatandatu, Biden yabaye perezida wa mbere wa Amerika wemeye ku mugaragaro iyicwa ry’Abanyarumeniya bagera kuri miliyoni 1.5 mu bwami bwa Ottoman, ryatangiye mu 1915, nk’igikorwa cya “jenoside”.
Itangazo ryashyizwe ahagaragara ku munsi wo kwibuka jenoside yakorewe Abanyarumeniya rigira riti: “Buri mwaka kuri uyu munsi, twibuka ubuzima bw’abantu bose bapfuye muri jenoside yo muri Arumeniya yo mu gihe cya Ottoman kandi twiyemeje kwirinda ko ayo mahano yazongera kubaho ukundi.”
Ati: “Abanyamerika bubaha abo Banyarumeniya bose bazize itsembabwoko ryatangiye mu myaka 106 ishize uyu munsi.”
Iri tangazo rya Biden rije mu gihe umubano utifashe neza hagati ya Amerika na Turkiya, yari yaraburiye mbere ko kwemera ko ubwo bwicanyi ari jenoside byakomeza kwangiza umubano hagati y’abafatanyabikorwa ba NATO.
Turkiya yemeye urupfu rw’Abanyarumeniya mu bwami bwa Ottoman mu gihe cy’Intambara ya Mbere y’Isi Yose, ariko ihakana yivuye inyuma ko ubwo bwicanyi bwateguwe kandi ari jenoside.
Mu itangazo ryayo, minisiteri y’ububanyi n’amahanga ya Turkiya yamaganye ibyatangajwe na Perezida Biden avuga ko nta “shingiro ry’abahanga n’amategeko” ivuga ko ibisabwa kugira ngo ibyabaye byitwe “jenoside” bitubahirijwe nk’uko biteganywa n’amategeko mpuzamahanga.
Ministiri w’ububanyi n’amahanga wa Turkiya, Mevlut Cavusoglu, abinyujije kuri twitter, yagize ati “Ntacyo dufite cyo kwigira ku bantu bose ku hahise hacu”.
Kurikira ibiganiro n’amavidewo binyura kuri Bwiza TV
