Urukiko rwa gisirikare rwa division ya kane mu gihugu cya Uganda rwagumije muri Gereza Nkuru ya Gulu abantu 15 bose bashinjwa ibyaha by’ubugambanyi, aho bashinjwa gushaka gushoza intambara mu gihugu.
Aba bakekwa ni Collins Lincoln Ongei, Frank Cajetan Onentho, Richard Obonyo, Fred Ocan, Bernard Okello, Steve Jakisa na Alex Komakech.
Abandi ni Denise Palyel, Francis Ocungi–rwoth, Valentino Alworonga, Ronald Oryema, Gerald Ocowun, Alfoncia Olama na Michael Omony.
Nk’uko tubikesha ikinyamakuru The Independent cyo muri Uganda, Urukiko rwumvise ko abaregwa ku ya 1 Mata mu Karere ka Nebbi bateguraga gushoza intambara kuri guverinoma, icyaha cy’ubugambanyi kinyuranyije n’ingingo ya 23 (1) (c) y’itegeko ryerekeye amategeko ahana.
Ubushinjacyaha buyobowe na Capt. Augustine Tumwebaze bwabwiye urukiko ko iperereza ryimbitse kuri uru rubanza rigikomeje. Bwasabye urukiko ko rusubikwa kugira ngo bubone umwanya wo gukora iperereza mbere yuko iburanisha ritangira.
Col. George Nambafu, Umuyobozi w’urukiko yagumije abakekwa muri Gereza Nkuru ya Gulu kugeza ku ya 10 Gicurasi igihe iburanisha rizatangirira. Ibi nk’uko Nambafu abitangaza ngo ni ugutanga umwanya uhagije kugira ngo ubushinjacyaha busoze iperereza ryabwo.
Kurikira ibiganiro n’amavidewo binyura kuri Bwiza TV
