N’ubwo yahamijwe ibyaha byibasiye inyokomuntu, Urukiko Mpuzamahanga Mpanabyaha ntirwahisemo guha igihano kinini gishobora kuboneka Umugande Dominic Ongwen wahoze ari umuyobozi w’inyeshyamba, rushingiye ku kababaro nawe yanyuzemo nk’uwagizwe umusirikare ari umwana.
Kuri uyu wa Kane, itariki 06 Gicurasi, nibwo Urukiko Mpuzamahanga Mpanabyaha (ICC) rwakatiye Dominic Ongwen igifungo cy’imyaka 25 kubera ibyaha by’intambara n’ibyaha byibasiye inyokomuntu.
Uyu wahoze ari umusirikare w’umwana wabaye umuyobozi w’inyeshyamba za Lord Resistance Army (LRA) yahamijwe muri Gashyantare ibyaha 61 birimo gufata ku ngufu, gukoresha abantu ubucakara bw’imibonano mpuzabitsina, gushimuta abana, iyicarubozo n’ubwicanyi.
Umwanzuro w’urukiko uti “Dominic Ongwen yateguye byimazeyo ibyo byaha byose. Yagize uruhare runini muri komisiyo yabo, yagize uruhare mu igenamigambi kandi ku giti cye yabigizemo uruhare. Ni we wafashe icyemezo cyo kugaba ibitero, atoranya abarwanyi kandi atanga amabwiriza yihariye mbere ya buri gitero. ”
Ongwen nawe yashimuswe na LRA ari umwana w’umunyeshuri w’imyaka icyenda nk’uko iyi nkuru dukesha Detch Well ibyibutsa.
Urubanza rwe ni rwo rwa mbere rwageze muri ICC uregwa nawe yarakorewe ibyaha yashinjwaga.
Urukiko rwasuzumye ‘imibabaro myinshi’
Ongwen ati: “Ndi imbere y’uru rukiko mpuzamahanga mfite ibirego byinshi, nyamara kandi ni njye wa mbere wakorewe ishimutwa ry’abana. Ibyambayeho, sinizera ko byabaye no kuri Yesu Kristo.”
Abashinjacyaha bari basabye igihano kitarengeje imyaka 30 ICC yemeye kubera ihungabana uregwa yagize.
Umucamanza wateguye urubanza, Bertram Schmitt yagize ati: “Yari umunyabyaha wazanye nkana akababaro ku bahohotewe, ariko kandi, nyirabayazana we ubwe yigeze kwihanganira imibabaro ikabije yatewe n’itsinda nyuma yabereye umunyamuryango ukomeye n’umuyobozi”.
LRA yari izwi cyane kubera gukoresha abana b’abasirikare.
Uyu mutwe uyobowe na Joseph Kony, wakoze amarorerwa mu majyaruguru ya Uganda mu myaka irenga makumyabiri mbere yo gusubira inyuma ikimurira ibikorwa byawo muri Repubulika Iharanira Demokarasi ya Congo na Sudani y’Amajyepfo.
Kurikira ibiganiro n’amavidewo binyura kuri Bwiza TV
