Louise Mushikiwabo, Umunyamabanga Mukuru w’Umuryango w’Ibihugu bikoresha Igifaransa (La Francophonie), kuri uyu wa Gatatu ushize yagize Umunya-Mauritania, Ahmedou Ould, Intumwa ye Idasanzwe mu gihugu cya Tchad igomba gukomeza gukurikiranira hafi uko byifashe muri iki gihugu giherutse gutakaza uwari umuyobozi wacyo, Marechal Idris Deby Itno, wiciwe ku rugamba mu kwezi gushize.
Igenwa rya Ahmedou Ould kuri uyu mwanya riri mu rwego rw’umugambi wa OIF wo guherekeza iki gihugu mu nzibacyuho igomba kumara amezi 18. Mu minsi iri imbere azaba azayobora intumwa zo ku rwego rwo hejuru rwa Francophonie zizerekeza I N’Djamena, aho biteganyijwe ko zizagirana ibiganiro n’abayobozi bashya n’abandi bagira uruhare muri politiki n’imibereho muri Tchad.
Iyi Ntumwa Idasanzwe y’Umunyamabanga Mukuru wa OIF izakorana bya hafi n’abandi bafatanyabikorwa mpuzamahanga, barimo Afurika Yunze Ubumwe n’Umuryango w’ubukungu w’Ibihugu bya Afurika yo Hagati, hagamijwe gutanga umusanzu mu micungire y’inzibacyuho mu mahoro, yumvikanweho kandi ihuriweho na bose.
Nk’uko tubikesha Ibiro Ntaramakuru bya Afurika yo Hagati (Agence d’Information d’Afrique Centrale), imyanzuro y’ubutumwa bwa Ahmedou Ould Abdallah izasuzumwa n’Akanama Gahoraho ka OIF. Uyu mugabo yahoze ari minisitiri w’ububanyi n’amahanga n’ubutwererane wa Repubulika ya Kisilamu ya Mauritania.
Yabaye kandi mu myanya yo ku rwego rwo hejuru muri dipolomasi mpuzamahanga nko mu Muryango w’Abibumbye aho yabaye intumwa idasanzwe y’Umunyamabanga Mukuru mu Burundi no muri Somalia, ndetse akaba intumwa idasanzwe ishinzwe Afurika y’uburengerazuba n’Umuyobozi w’Ibiro by’Umuryango w’Abibumbye muri Afurika y’uburengerazuba.
Kurikira ibiganiro n’amavidewo binyura kuri Bwiza TV
