Guverinoma ya Tchad kuri uyu wa Mbere yashinje ingabo za Centrafrica kwica abasirikare bayo 6 mu gitero cyagabwe ku birindiro byo mu majyepfo y’igihugu, bavuga ko ari “icyaha cy’intambara” kitagenda gutyo kidahanwe.
Minisitiri w’ububanyi n;’amahanga wa Tchad, Cherif Mahamat Zene mu itangazo ryashyizwe ahagaragara yagize ati “Ku Cyumweru mu gitondo, Ingabo za Centrafrica zagabye igitero ku birindiro bya Sourou muri Tchad … bishe umusirikare wa Tchad, bakomeretsa batanu kandi bashimuta abandi batanu bahise bicirwa i Mbang ku ruhande rwa Repubulika ya Centrafrica.
Igihugu cya Centrafrica kikaba gikunze gushinja umuturanyi wacyo mu majyaruguru gushyigikira imitwe y’inyeshyamba ifite ibirindiro muri Tchad.
Umwe mu bashinzwe umutekano muri Tchad utifuje ko amazina ye atangazwa, yabwiye AFP ko abasirikare ba Centrafrica bari bakurikiranye umwe mu mitwe y’inyeshyamba myinshi ikorera mu gihugu hakurya y’umupaka.
Izo nyeshyamba akaba ari zo mu mutwe wa Unity for Peace in Central Africa (UPC), umwe mu mitwe ikomeye irwanya ubutegetsi bwa Centrafrica, ukaba umwe mu yishyize hamwe igamije gukuraho Perezida Archange Touadera.
AFP iravuga ko abayobozi ba Centrafrica ntacyo barayitangariza ku bivugwa na Tchad.
Ibirindiro bya Sourou biherereye hafi y’igiturage cya Mbere, byari birinzwe n’abasirikare 12, byatewe mu rukerera rwo ku Cyumweru nk’uko byakomeje bitangazwa na Zene mu itangazo.
Iki cyaha cy’intambara kirakomeye cyane kandi iki gitero cyica, cyatekerejweho mbere, gitegurwa kandi gikorerwa imbere muri Tchad, kubw’impamvu zizwi gusa na guverinoma ya Centrafrica…ntikizagenda kidahanwe”.
Minisitiri Zene yavuze ko Tchad ihamagarira Umuryango Mpuzamahanga kuba umutangabuhamya ku cyo yise ubushotoranyi bukabije.
Kurikira ibiganiro n’amavidewo binyura kuri Bwiza TV
