Umunya-Argentine Sergio Kunu Agüero wari umaze imyaka ibarirwa mu icumi akinira Manchester City yo mu Bwongereza, yamaze kwerekeza muri FC Barcelona yo muri Espagne.
Aguero w’imyaka 32 y’amavuko yasinye amasezerano y’imyaka ibiri muri FC Barcelona nk’uko iyi kipe yabyemeje ku mbuga nkoranyambaga zayo, nyuma yo gutsinda ikizamini cy’ubuzima.
Abahagarariye Agüero na Barça bumvikanye ko ikipe yamwifiza amasezerano ye atarangiye yamutangaho angana na miliyoni 100 z’ama-Euro.
Kunu Agüero asanze muri FC Barcelona Lionel Messi usanzwe ari Kapiteni we mu kipe y’Igihugu ya Argentine.
Uyu rutahizamu wageze muri FC Barcelona ku buntu, yari umukinnyi wa Manchester City kuva muri 2011 ubwo yayigeragamo avuye muri Atlético de Madrid yo muri Espagne.
Nk’umukinnyi wa Manchester City Agüero yatwaranye na yo ibikombe bitandukanye (bitarimo UEFA Champions), ayivamo afite uduhigo two kuba umukinnyi wayitsindiye ibitego byinshi mu mateka yayo (260 mu mikino 390), ndetse n’umukinnyi watsinze ibitego byinshi mu mateka ya Premier league akinira ikipe imwe.
Aguero kandi yavuye muri shampiyona y’Abongereza nka rutahizamu wayo wa kane w’ibihe byose, inyuma ya Alan Shearer, Wayne Rooney na Andy Cole.
Byitezwe ko nyuma ya Agüero FC Barcelona isinyisha abandi bakinnyi, barimo myugariro Eric Garcia, Georginio Wijnaldum na Memphis Depay.
