Minisitiri w’Ubuzima, Dr Ngamije Daniel, yatangaje ko u Rwanda ruteganya kwakira doze miliyoni eshatu n’ibihumbi magana atanu (3,500,000) z’urukingo rw’icyorezo cya Covid-19 rwa Pfizer mbere y’uko uyu mwaka w’2021 urangira, bikazafasha iki gihugu gukingira abantu benshi nk’uko cyabyiyemeje.
Dr Ngamije yabitangarije mu kiganiro cyatambutse kuri televiziyo y’igihugu kuri uyu wa 1 Kamena 2021, cyakurikiye ibyemezo by’Inama y’Abaminisitiri yibandaga ku ngamba zo kwirinda icyorezo cya Covid-19.
Mu gitondo cyo kuri uyu wa 1 Kamena, Minisiteri y’Ubuzima yatangaje ko u Rwanda rwaraye rwakiriye izindi doze 100,600 z’urukingo rwa Pfizer, zikaba ziyongera ku zindi 102,000 z’ubu bwoko iki gihugu cyahawe muri gahunda ya Covax tariki ya 3 Werurwe 2021; izo zikaba zaramaze no guhabwa Abaturarwanda.
Iyi Minisiteri yagize iti: “U Rwanda rwaraye rwakiriye izindi doze zigera ku 100,600 z’urukingo rwa Pfizer binyuze muri gahunda ya Covax.”
Minisitiri Ngamije yavuze ko nyuma yo kwakira izi doze, u Rwanda ruteganya kwakira izindi mu mpera z’uku kwezi kwa Kamena, rukazageza mu mpera z’uyu mwaka rumaze kwakira 3,500,000.
Yagize ati: “Izindi tuzazibona mu mpera z’ukwezi kwa Gatandatu na none ni iza Pfizer, ku buryo kugeza mu mpera z’uyu mwaka mu kwezi kwa 12, twiteguye kwakira izindi nkingo 3,500,000 za Pfizer. Mu minsi iri imbere tuzongera umubare munini w’abantu bazaba bakingiwe mu gihugu.”
Hakoreshejwe doze u Rwanda rwahawe kuva tariki ya 3 Werurwe 2021 zirimo iz’urukingo rwa Pfizer na AstraZeneca, abagera ku 350,000 bamaze gukingirwa barimo 167,886 bahawe doze ya kabiri kugeza kuri uyu wa 31 Gicurasi nk’uko Minisiteri y’Ubuzima ibyerekana.
Kurikira ibiganiro n’amavidewo binyura kuri Bwiza TV
