Ishyirahamwe ry’umukino wa Cricket muri Uganda (UCA), kuri uyu wa 3 Kamena 2021 ryatangaje ko ritazohereza abakinnyi mu irushanwa ry’abagore ryateguwe mu rwego rwo kwibuka abazize jenoside yakorewe Abatutsi, Kwibuka Memorial Women’s T20I Tournament 2021.
Itangazo ryashyizweho umukono n’umuyobozi w’iri shyirahamwe, Martin Ondeko rivuga ko impamvu iki cyemezo cyafashwe, ariko bamwe mu bakinnyi b’ikipe y’igihugu ya Cricket y’abagore banduye icyorezo cya Covid-19.
Yagize ati: “Ku bw’amahirwe make, bitewe n’uko bamwe mu ikipe ya Lady Cricket Cranes habonetsemo abanduye Covid-19, twafashe icyemezo cyo gusubika urugendo rwacu i Kigali mu irushanwa rya Kwibuka Women’s Twenty20…”
Iri shyirahamwe kandi rivuga ko ryabaye rihagaritse ibikorwa byose bya Cricket kugeza mu gihe kitaramenyekana. Ku banduye Covid-19, ngo harakorwa iperereza kugira ngo rimenye uko iki cyorezo cyageze mu bakinnyi kandi hari harakozwe igishoboka mu rwego rwo kucyirinda.
Iri rushanwa ryateguwe n’ishyirahamwe rya Cricket mu Rwanda (RCA), rizatangira tariki ya 12 Kamena 2021, ribere kuri sitade ya Gahanga iherereye mu Karere ka Kicukiro. Biteganyijwe ko rizitabirwa n’amakipe y’ibihugu arimo iya: Namibia, Nigeria na Botswana.
Kurikira ibiganiro n’amavidewo binyura kuri Bwiza TV
