Ikipe y’Igihugu ‘Amavubi’ inyagiye iya Repubulika ya Centrafrique ibitego 5-0, mu mukino wa gicuti amakipe yombi yari yahuriyemo kuri uyu wa Mbere.
Amavubi na Centrafrique bari bahuriye kuri Stade Amahoro i Remera, mu mukino wa gicuti wa kabiri. Ni nyuma y’ubanza wabaye mu cyumweru gishize Amavubi yari yatsinzemo Centrafrique ibitego 2-0.
Igice cya mbere cy’uyu mukino cyarangiye Amavubi ari imbere n’ibitego 2-0.
Rutahizamu Hakizimana Muhadjili ni we wafunguye amazamu ku gitego cyo ku munota wa kane, nyuma y’amakosa yari akozwe n’umuzamu wa Centrafrique.
Rutahizamu Yves Mugunga wa APR FC ni we watsindiye Amavubi y’u Rwanda igitego cya kabiri, mbere gato y’uko igice cya kabiri kirangira.
Igice cya kabiri cy’umukino cyaranzwe n’impinduka ku ruhande rw’umutoza Mashami Vincent, zasize Amavubi abonye ibindi bitego bitatu.
Twizeyimana Martin Fabrice winjiye mu kibuga asimbura yatsindiye Amavubi igitego cya gatatu ku munota wa 65, ku mupira yari ahawe na Bertrand Iradukunda akawutera mu izamu adahagaritse.
Uyu musore wa Police FC yatsinze igitego cya gatanu cy’Amavubi ku munota wa 82, nyuma y’iminota ine Nshuti Dominique Savio abyaje umusaruro amakosa y’umuzamu wa Centrafrique agatsinda igitego cya Kane.
Nta gikomeye Centrafrique yari iyobowe na Geoffrey Kondogbia yigeze ikora muri uyu mukino, keretse ishoti rikomeye ryo ku munota wa nyuma w’umukino ryakuwemo n’umuzamu Mvuyekure Emery.
Gutsinda Centrafrique byitezweho gufasha Amavubi gukomeza kwitegura imikino y’ijonjora ryo gushaka itike y’Igikombe cy’Isi agomba guhuriramo na Kenya na Mali muri Nzeri uyu mwaka.
