Abagize guverinoma nshya ya Uganda bagera muri 17 bananiwe kwitabira umuhango w’irahira kuwa mbere ushize , aho bamwe bananiwe kugera aho bagombaga kurahirira ku Rubuga rw’Ubwigenge rwa Kololo kubera ko bamwe bishyize mu kato kubera guhura n’abanduye Covid-19, abandi barimo kuvurwa, mu gihe abandi bapfushije ababo n’izindi mpamvu.
Uza imbere ku rutonde rw’abo baminisitiri batabashije kwitabira irahira ni Minisitiri w’intebe wungirije, Rebecca Kadaga, minisitiri ushinzwe ibikorwa bya EAC, Hilary Onek, minisitiri ushinzwe ibiza, Maria Goretti Kitutu, ushinzwe ibibazo bya Karamoja, Judith Nabakooba, ushinzwe iterambere ry’imijyi na Cheptoris Mangusho, minisitiri w’amazi n’ibidukikije.
Abandi ni minisitiri muri perezidansi, Babirye Milly Babalanda n’intumwa nkuru ya leta, Kiryowa Kiwanuka kubera ko baherutse guhura n’abantu banduye Covid-19. Minisitiri w’imirimo ya leta, Muruli Mukasa n’umunyamabanga wa leta muri minisitiri y’ububanyi n’amahanga ushinzwe ibibazo byo mu karere, John Mulimba.
Undi kandi utararahiye ni Dr. Monica Musenero wo mu biro bya Perezida Ushinzwe Ubumenyi, Ikoranabuhanga n’udushya wapfushije nyina mu gitondo cyo ku wa mbere ndetse n’umunyamabanga wa leta ushinzwe Triangle ya Luwero n’akarere ka Rwenzori, Alice Kaboyo, igenwa rye ryanzwe kubera ibirego bya ruswa yavuzweho.
Mu bandi batarahiye kandi nk’uko tubikesha ikinyamakuru The Independent harimo abanyamabanga ba leta batandukanye nka Fred Kyakulaga, Huda Olero, Evelyn Anite, Henry Okello Oryem, Margaret Muhanga, na Victoria Rusoke.
Kugirango ugere ahoumuhango wo kurahira wabereye, umuntu yasabwaga kwerekana ibisubizo by’uko yipimishije COVID-19 . Ibirori byitabiriwe na Perezida Yoweri Museveni na Madamu we Janet Museveni babonye indahiro za Visi Perezida Maj. Rtd. Jessica Alupo, Minisitiri w’intebe akaba n’umuyobozi w’ibikorwa bya guverinoma, Robinah Nabbanja, Minisitiri w’intebe wungirije wa kabiri, Moses Ali na Minisitiri w’intebe wa gatatu, Lukia Nakadama.
Abandi barahiye ni Minisitiri w’Uburezi na Siporo, Janet Kataha Museveni, Maj. Gen. Rtd Jim Muhwezi, Minisitiri w’umutekano, Hajati Misa Kabanda, Minisitiri w’umurwa mukuru wa Kampala n’ibikorwa by’imijyi, Justine Kasule Lumumba, Minisitiri mu biro bya Minisitiri w’intebe ushinzwe imirimo rusange, Thomas Tayebwa, umuhwituzi wa guverinoma, Frank Tumwebaze, Minisitiri w’ubuhinzi, amatungo n’uburobyi n’abandi.
Kurikira ibiganiro n’amavidewo binyura kuri Bwiza TV
