Guverineri w’Intara y’Iburengerazuba, Habitegeko François yatangaje ko umubare w’abazahazwa n’icyorezo cya Covid-19 mu Karere ka Rubavu uri kwiyongera, ukaba uri hafi kurenga ubushobozi bw’ibitaro bya Gisenyi biri kubakira.
Nk’uko RBA yabitangaje, Guverineri Habitegeko yavuze ko kuva muri Werurwe kugeza ubu, i Rubavu hamaze kuboneka abantu 1400 banduye Covid-19, abarenga 60% bose bakaba barabonetse muri uku kwezi kwa Kamena gusa.
Mu rwego rwo gushakira umuti ikibazo cy’ubushobozi buke bw’ibitaro bya Gisenyi bijyanye n’umubare w’abakomeje kuzahazwa n’iki cyorezo, hafashwe icyemezo cy’uko abarembye baboneka mu karere ka Rubavu bajya boherezwa mu bitaro by’intara, bya Kibuye.
Akarere ka Rubavu ni kamwe mu twibasiwe na Covid-19 cyane mu gihugu kuva mu ntangiriro z’uku kwezi kwa Kamena 2021. Minisitiri w’Ubuzima yigeze gutangaza guhunga kwatewe n’iruka rya Nyiragongo muri Gicurasi 2021 kuri mu mpamvu z’ubwandu bwinshi buboneka muri aka karere.
Kurikira ibiganiro n’amavidewo binyura kuri Bwiza TV
