Inzego z’umutekano zitandukanye za Uganda ziravuga ko zataye muri yombi abandi bantu bane barimo uwari uyoboye agatsiko k’abantu bakekwaho kugaba igitero kuri Gen Katumba Wamala ku itariki 01 Kamena 2021 cyahitanye umukobwa we n’umushoferi akarokokana n’umurinzi we.
Uyu bivugwa ko ari we wari uyoboye aka gatsiko kiswe ak’iterabwoba k’imbere mu gihugu, we ngo yashatse no kurwanya inzego z’umutekano zigiye kumuta muri yombi ubwo yashakaga kwambura umupolisi imbunda akaraswa nyuma agahitanwa n’ibikomere.
Umukuru w’Igipolisi cya Uganda Wungirije, DIGP Maj. Gen. Paul Lokech, nk’uko bigaragara kuri twitter y’igipolisi yavuze ko itsinda rishinzwe gukurikirana abagabye iki gitero ryakurikiranye ndetse rigata muri yombi uwitwa Lubwama Hussein bita Kinene Christopher na none bita Master, utuye Kabulengwa, muri Kyabando, wafatiwe ku muhanda Nansana Nabweru.
Nyuma yo guhatwa ibibazo yemeye ko yagize uruhare muri iki gitero gikaze ubwo yakurikiranye urugendo rwa Gen Katumba ava iwe agahita abimenyesha itsinda ryari ryiteguye kumurasa amaze kumenya icyerekezo afashe.
Gen Lokech yavuze ko ibi byagezweho nyuma y’aho itsinda ribishinzwe ryakurikiranye umwe mu bakekwa akarigeza ku ifatwa ry’uwitwa Muhammad Kagugube bakunda kwita Bafumoya ku itariki 26 Kamena 2021.
Kurikira ibiganiro n’amavidewo binyura kuri Bwiza TV->https://www.youtube.com/channel/UC_Wx4Sy2IawVLtp5-QMRhnQ]
