Umunyemari w’Umunyakenya, Joseph Mboye Nyamuthe wari ufungiye muri Gereza Nkuru ya Murembwe, mu gihugu cy’u Burundi akurikiranweho icuruzwa ry’ibiyobyabwenge, aravugwaho gutoroka mu ijoro ryo kuwa Gatanu ushize, aho yatorotse avuye mu Bitaro bya Rumonge aho yari yajyanwe kwivurirwa.
Bivugwa ko aho yari arwariye muri ibi bitaro yari arinzwe n’abapolisi babiri, akaba yari yajyanwe kuhavurirwa ku mabwiriza y’uwungirije umuyobozi w’ivuriro ryo muri Gereza ya Murembwe, Adeline Ndayisenga.
Amakuru y’itoroka ry’uyu munyemari wo muri Kenya akimara kujya ahagaragara, uyu wungirije umuyobozi w’iri vuriro ryo muri gereza, uwungirije umuyobozi wa gereza n’abo bapolisi babiri bari bamurinze ku Bitaro bya Rumonge bahise batabwa muri yombi bafungirwa kuri burigade ya Rumonge.
Iyi nkuru dukesha UBMNews yibutsa ko uyu munyemari w’Umunyakenya wari umuyobozi w’ikigo PONA Pharmaceuticals afatanyije n’undi munyemari w’Umurundi, Prosper Hakizimana bakunda kwita Gisiga.
Iki kigo cyashinjwe gukora ubucuruzi bw’ibiyobyabwenge bikorwa mu bumara bwa Ephedrine na Ketamine byagiye bikoreshwa n’imitwe y’iterabwoba irimo Al Shabab yo muri Somalia.
Aba bayobozi ba PONA Pharmaceuticals batawe muri yombi mu mpera z’ukwezi kwa Mata muri uyu mwaka wa 2021 nyuma y’aho ibihugu bitandukanye bisabiye ibisobanuro Leta y’u Burundi ku bijyanye n’ubwo bumara bukorwamo ibyo biyobyabwenge bwari bukomeje kwinjira mu gihugu ku rugero rurenze urwemewe kwinjizwa mu gihugu icyo ari cyo cyose ku Isi.
Perezida Nkurunziza niwe wafunguye iki kigo mu 2019, inyuma ye ibumoso, Joseph Nyamuthe na Gisiga iburyo
Hari andi makuru ariko yagiye ava mu bakozi b’iki kigo cya PONA Pharmaceuticals avuga ko hari n’ibikomerezwa byo mu ishyaka CNDD-FDD riri ku butegetsi mu Burundi, byaba byaragize uruhare mu gutorokesha uyu munyemari Joseph Nyamuthe.
Babivuga babishingiye ku kuba uyu Munyakenya yari afitanye umubano uhambaye n’abo bayobozi bo mu ishyaka rya CNDD-FDD.
