Urwego rw’Igihugu rw’Ubugenzacyaha (RIB) rwemeje itabwa muri yombi ry’abantu babiri; umuyobozi w’Umudugudu wa Rubona, mu Murenge wa Karangazi, mu Karere ka Nyagatare na Steven Mutsinzi bashinjwa gusagarira umunyamakuru wari uri mu kazi ke.
Nk’uko RIB yabitangaje kuri Twitter, undi muntu wa gatatu ukekwa yaracitse aracyashakishwa.
Iki hohoterwa ryakorewe umunyamakuru ryabaye ku Cyumweru gishize, itariki 18 Nyakanga, aho uyu munyamakuru Charles Ntirenganya wa Flash FM yakomerekejwe biba ngombwa ko ajya kwa muganga.
Amakuru aravuga ko Ntirenganya yari yagiye i Nyagatare gukora inkuru ku ibura rya hato na hato ry’amazi muri uyu mudugudu wa Rubona.
Abatawe muri yombi bafungiye kuri Station ya RIB ya Karangazi mu gihe iperereza rikomeje mbere y’uko dosiye zabo zishyikirizwa ubushinjacyaha.
Avugana na The New Times, Umuvugizi wa RIB, Dr Thierry B. Murangira, yibukije ko umuntu wese ufatwa akora icyaha cyo gukubita no gukomeretsa abigambiriye yitabwaho uko bikwiye.
Icyaha cyo gukubita no gukomeretsa kikaba gihanishwa ingingo ya 121 y’itegeko numero 68/2018 ryo kuwa 30/08/2018 riteganya igihano kiri hagati y’imyaka 3 n’imyaka 5 ku muntu wese ugihamijwe.
Kurikira ibiganiro n’amavidewo binyura kuri Bwiza TV
