Kuri uyu wa Kabiri, itariki 03 Kanama, abantu 37 baguye mu mpanuka ikomeye yabereye ahitwa Zambougou, mu birometero 20 uvuye mu mujyi wa Ségou, rwagati muri Mali nk’uko byatangajwe na minisiteri y’ubwikorezi n’ibikorwaremezo.
Biravugwa ko imodoka itwara abagenzi yagonganye n’ikamyo yari itwaye ibiribwa nk’uko byasobanuwe n’iyi minisiteri mu itangazo yashyize ahagaragara.
Imibare y’agateganyo y’abapfuye ni 37 mu gihe abandi benshi bakomeretse.
Impanuka ikaba yarabaye ku isaha ya saa tanu z’amanywa ubwo amapine y’iyi kamyo yari itwaye ibiribwa yaturikaga igahita igonga imodoka itwara abagenzi yaturukaga mu kindi cyerekezo nk’uko jandarumori ya Mali yabitangarije Anadolu Agency.
Ku rundi ruhande ariko, amakuru yatangajwe na AFP avuga ko Guverineri wa Segou, Alassane Traore, yavuze ko iyi mpanuka yatewe no gutwara mu mvura.
Uwarokotse iyi mpanuka ngo akaba yavuze ko umuhanda wanyereraga kandi utagaragaraga neza kubera imvura ikabije ikamyo ntibashe gufata feri ku gihe.
