Abarwanyi b’umutwe wa TPLF, w’Abanya-Tigray bafatanyije n’umutwe w’abarwanyi bo mu bwoko bw’Abanya- Oromo batangaje muri iki cyumweru ko ubu bageze mu birometero 220 uvuye mu murwa mukuru wa Ethiopia, Addis Abeba, ugana mu majyaruguru y’uburasirazuba nyuma yo kwigarurira Umujyi wa Shewa Robit.
Guverinoma ya Ethiopia ntacyo iratangaza kuri ayo makuru, ariko hari n’amakuru yemezwa n’abadipolomate bamwe avuga ko inyeshyamba zaba zarageze no mu gace ka Debre Sina kari mu birometero 30 uvuye mu murwa mukuru.
Mu mpera z’ukwezi kw’Ukwakira, TPLF yari yigambye ko yafashe imijyi ibiri y’ingenzi mu Ntara ya Amhara, mu birometero bisaga gato 300 basatira umurwa mukuru, ariko Guverinoma ihakana ayo makuru.
Kuri uyu wa Mbere, Minisitiri w’Intebe wa Ethiopia, Abiy Ahmed watangije intambara ku barwanyi bo muri Tigray mu Ugushyingo 2020, yavuze ko kuri uyu wa Kabiri yigira ku rugamba akajya kuyobora ingabo ziri kurwana n’inyeshyamba.
Iyi nkuru dukesha Jeune Afrique ikaba ivuga ko u Bufaransa bwamaze gusaba abaturage babwo bakiri muri Ethiopia kuhava, mu gihe Umuryango w’Abibumbye guhera kuri uyu wa Kane utaha utangira guhungisha imiryango y’abakozi bawo mpuzamahanga bari muri iki gihugu.
Kuri uyu wa kabiri kandi, Abakuru b’ibihugu bya Afurika y’Epfo, Cyril Ramaphosa na mugenzi we wa Kenya, Uhuru Kenyatta, bakaba bongeye guhamagarira impande zihanganye guhagarika imirwano zikajya ku meza y’ibiganiro.
