Igikombe cya Afurika cy’ibihugu cya 2021 cyari giteganyijwe kubera muri Caméroun gishobora gusubikwa kubera ubwiyongere bwa virusi ya COVID-19 yihinduranyije ya Omicron.
Byari biteganyijwe ko Igikombe cya Afurika kizakinwa hagati y’itariki ya 09 Mutarama n’iya 06 Gashyantare 2022.
Televiziyo ya RMC Sport yo mu Bufaransa yatangaje ko Impuzamashyirahamwe y’Umupira w’Amaguru muri Afurika (CAF) ishobora gusubika iki gikombe kubera ubwiyongere bwa virusi ya Omicron ku mugabane wa Afurika.
Mu mpera z’Ukwakira uyu mwaka Komisiyo ishinzwe gutegura ririya rushanwa yahuye n’ubuyobozi bwa CAF, mu rwego rwo kuganira ku bigomba kwitabwaho mu gutegura ririya rushanwa.
Komisiyo icyo gihe yavuze ko hakenewe ukwitwararika mu buryo bwihutirwa kugira ngo irushanwa rikomeze.
Kimwe mu bice byasabwe kwitabwaho byihutirwa ni ingamba zo kwirinda icyorezo cya COVID-19 no kwakira abafana muri za Stade.
Icyo gihe iriya Komisiyo yashyize umukono ku masezerano yo gutegura Igikombe cya Afurika na CAF na Caméroun, banzura ko irushanwa rizakomeza nta kibazo.
