Kuri uyu wa Kane, minisiteri y’imari yavuze ko Ethiopia ishaka gutora ingengo y’imari y’inyongera ifite agaciro ka miliyari 2,5$ kugira ngo ifashe gahunda z’imari zo kongera kubaka uduce twangijwe n’intambara no gutanga ubutabazi.
Iyi ngengo y’imari ni nini cyane kuruta uko byavuzwe mbere mu gihugu gifite imyenda myinshi. Igitangazamakuru gifitanye isano na guverinoma, Fana, cyatangaje kandi ku wa Mbere ko guverinoma ishaka ingengo y’imari y’inyongera ya miliyoni 102 z’amadolari y’Amerika kugira ngo akoreshwe mu gusubiza mu buzima busanzwe abantu bahuye n’intambara.
Minisiteri yagize iti: “Ingengo y’imari y’inyongera izakoreshwa mu mutekano w’igihugu, imfashanyo z’ubutabazi … ndetse n’indi mirimo ya leta ikenewe”.
Iki cyifuzo kigomba kwemezwa n’inteko ishinga amategeko, ariko minisiteri ntiyavuze uko amafaranga azakusanywa.
Tigray People Liberation Front (TPLF) hamwe na leta bamaze umwaka urenga mu ntambara ikomeje guhitana abantu ibihumbi n’ibihumbi.
Mu bibasiwe muri iyi ntambara harmo n’abakozi ashinzwe ubutabazi.
Ishami ry’umuryango w’abibumbye ryita ku mpunzi, UNHCR, ryatangaje ku wa Kane ko umwe mu bakozi baryo yiciwe mu majyaruguru ya Ethiopia, ariko nta bisobanuro yatanze.
Filippo Grandi, ukuriye UNHCR, yanditse ku rubuga rwa twitter ko uyu mukozi yishwe ku itariki ya 28 Ukuboza.
