Umugabo w’imyaka 39 akurikiranwe n’ubushinjacyaha akekwaho kwica umwana we w’imyaka 2 akanakomeretsa umugore we w’imyaka 34 akoresheje agasuka .
Ni icyaha bivugwa ko cyakozwe ku itariki ya 03 Mutarama 2022 mu gihe cya saa mbiri z’ijoro mu mudugudu wa Nzovi, Akagari ka Nyamiyaga, Umurenge wa Muyira ho mu Karere ka Nyanza, nyuma y’uko batonganye bapfuye ko atamutekeye.
Ubwo yahatwaga ibibazo nk’uko iyi nkuru dukesha Ubushinjacyaha Bukuru ivuga, uregwa yemeye ko yakubise agasuka mu mutwe umugore we ubwo yinjiraga mu nzu, akubise ubwa kabiri n’ubwa gatatu gafata umwana yari ahetse.
Ngo bahise bajyanwa kwa muganga bagerayo umwana ahita apfa.
Ibyaha akurikiranyweho biramutse bimuhamye yahanishwa igifungo kigera ku myaka 25 , nk’uko giteganywa kandi kigahanishwa ingingo ya 21 n’ingingo ya 107 y’Itegeko nº 68/2018 ryo ku wa 30/08/2018 riteganya ibyaha n’ibihano muri rusange
