Cabo Delgado: SAMIM na FADM bishe ibyibebe 31, bicirwa abasirikare 3

Ingabo z’umuryango wa SADC (SAMIM) zifatanyije n’iza Mozambique (FADM), zatangaje ko ziheruka kwivugana ibyihebe 31 byo mu mutwe wa Al Sunnah wa Jama’ah (ASWJ) umaze igihe warayogoje intara ya Cabo Delgado.

Ibi byihebe byiciwe muri Operasiyo ebyiri zikomeye zabaye hagati y’Ukwakira 2021 na Mutarama 2022 nk’uko SAMIM yabyemeje mu itangazo rigenewe abanyamakuru.

SAMIM yavuze ko ziriya Operasiyo zafatiwemo ndetse zisenyerwamo ibirindiro bitandukanye by’uriya mutwe biri mu gace ka Chai no ku mugezi wa Messalo; mu karere ka Macomia ho mu ntara ya Cabo Delgado.

Uretse ibirindiro byafashwe, hanishwe ibyihebe 31 na ho abagore 16, abana umunani n’abasaza babiri bari barashimuswe na byo barabohorwa.

SAMIM kandi ivuga ko zafashe imbunda zitandukanye, zirimo eshanu zo mu bwoko bwa RPG, Launchers zirindwi, eshanu zo mu bwoko bwa PKM Machine Gun na 48 zo mu bwoko bwa AK-47 na za grenades.

Ibindi bikoresho byafashwe Birimo imodoka, za moto, amaterefoni ndetse n’ibindi bikoresho by’ikoranabuhanga.

Ingabo za SADC zivuga ko muri ziriya Operasiyo zombi zahawe izina rya ‘buffalo’ zarwanyijwe mu buryo bukomeye, bituma bamwe mu basirikare bazo batakaza ubuzima abandi barakomereka.

Mu basirikare bapfuye ku ruhande rwazo harimo umwe na babiri bakomeretse, mu gihe ku ruhande rwa FADM hapfuye babiri abandi bane barakomereka.

Izi ngabo zivuga ko zikomeje gukurikirana ibyihebe mu rwego rwo kubihashya hagamijwe kugira ngo intara ya Cabo Delgado yongere kugira agahenge iheruka mbere ya 2017.