Umuvugizi wa Guverinoma wungirije, Alain Mukuralinda avuga ko ijambo ryavuzwe ku mubano w’u Rwanda na Uganda uri mu nzira igana aheza ryamaze gutaha.
Ni ubutumwa yatanze bwerekeye ifungurwa ry’umupaka wa Gatuna rizaba tariki ya 31 Mutarama 2022 nk’uko byemejwe na Minisiteri y’Ububanyi n’Amahanga.
Nk’uko bigaragara mu itangazo ry’iyi Minisiteri ryasohotse mu ijoro, ifungurwa ry’uyu mupaka rizakurikira uruzinduko Umugaba w’ingabo za Uganda zirwanira ku butaka akaba n’umuhungu wa Perezida Yoweri Museveni, Lt Gen. Muhoozi Kainerugaba yagiriye mu Rwanda tariki ya 22 Mutarama hamwe n’amasezerano yasinyiwe mu nama yahuje abakuru b’ibihugu byombi ku mupaka wa Gatuna tariki ya 21 Gashyantare 2020.
Muri uru ruzinduko rw’umunsi umwe, Gen. Kainerugaba yahuye na Perezida Paul Kagame, baganira ku buryo uyu mubano wakongera kuba mwiza nk’uko byahoze, banemeranya ko intambwe nziza izaterwa kugira ngo bigerweho.
Mu biganiro bitandukanye Mukuralinda yagiranye n’ibitangazamakuru, yavuze ko uruzinduko rw’uyu musirikare ruvuze ikintu kinini kuri uyu mubano, kandi ko rwazamuye icyizere cy’uko ibihugu byakongera kubana neza, we avuga ko cyageze kuri 50 cyangwa 60%.
Nyuma y’inkuru y’ifungurwa ry’umupaka wa Gatuna umaze imyaka 3 ufunze, Mukurarinda yavuze ko iryavuzwe (nyuma y’uruzinduko rwa Gen. Kainerugaba) ryatashye, kuko aho imfura zisezeraniye ari ho zihurira.
Yagize ati: “Iryavuzwe riratashye kuko aho imfura zisezeranye niho zihurira! Harakabaho umubano uhamye kandi urambye hagati ya Uganda n’u Rwanda.”
