Kuri iki Cyumweru, umwe mu bigaragambyaga yishwe mu gihe Abanyasudani ibihumbi n’ibihumbi bongeye guhurira ku ngoro ya perezida i Khartoum mu myigaragambyo yo kwamagana ihirika ry’ubutegetsi rya Jenerali Abdel Fattah al-Burhane maze basaba ubutabera na demokarasi.
N’ubwo abasirikari bitwaje imbunda bafunze imihanda n’ibiraro ndetse blocs ciment zigashyirwa ku cyicaro gikuru cya gisirikare no ku ngoro ya perezida, abigaragambya ntibacika intege ihirika ry’ubutegetsi ryakozwe mu mezi atatu ashize rikomeje kurwanywa.
Kuva ubutegetsi bwahirikwa, abigaragambya 79 bamaze kwicwa nk’uko ihuriro ry’abaganga bashyigikiye demokarasi babitangaza. Muri bo harimo umusore w’imyaka 27 warashwe mu gatuza kuri iki Cyumweru, itariki 30 Mutarama, i Khartoum, nk’uko iri huriro rikomeza rivuga ariko ridashobora kwemeza umubare w’abakomeretse.
Iyi nkuru dukesha AFP ivuga ko ashobora kuba yishwe n’isasu, nkuko byakunze kugaragara mu bihe byashize, cyangwa igisasu gisohora ibyuka biryana mu maso, nkuko byagenze ku bantu benshi bakomeretse hafi y’ingoro ya perezida, bahita batwarwa na bagenzi babo.
