Igisirikare cya Repubulika ya Demukarasi ya Congo (RDC) kizwi nka FARDC kiravuga ko cyishe abarwanyi 11 b’umutwe witwaje intwaro wa M23 cyangwa ARC (Armée révolutionnaire du Congo) ukorera muri Pariki y’Igihugu ya Virunga.
Komanda wa Regima y’3413 ikorera ku rubibi ruhuza RDC, u Rwanda na Uganda, Col. Honoré Rindugu yabwiye ibiro ntaramakuru by’Abafaransa, AFP, ko aba barwanyi baguye mu mutego abasirikare ba Leta bari babateze kuri uyu wa 30 Mutarama 2022.
FARDC yishe aba barwanyi mu rwego rwo kwihorera nk’uko Guverineri w’Intara ya Kivu y’Amajyaruguru, Lt Gen. Constant Ndima yari yarabirahiriye ubwo yari mu muhango wo gushyingura abasirikare babo 26 barimo uw’ipeti rya Colonel biciwe mu gace ka Nyesisi mu ijoro ryo ku wa 24 rushyira uwa 25 Mutarama.
Umutwe wa M23 wari wararambitse intwaro mu mwaka w’2013, bamwe bari bawugize bahungira muri Uganda no mu Rwanda. Gusa bivugwa ko hari abarwanyi bawo bayobowe na Sultani Makenga bihurije muri uyu mutwe wa ARC basubira muri Pariki ya Virunga; aba bakaba ari bo bashinjwa kugaba ibitero kuri FARDC mu bice bitandukanye bya Teritwari ya Rutshuru.
